نێزيكى 10 هزار كوردان نه‌شيان پشكدارى حه‌جا ئه‌ڤ ساله ببن
ئه‌ڤرۆ نيوز، نيوار محه‌مه‌د سه‌ليم:
سه‌رپه‌رشتێ تيما راگه‌هاندن و په‌يوه‌نديێن حه‌جيێن هه‌رێمێ ل سعوديێ راگه‌هاند كو د سه‌ر هندێ را كو ئه‌ڤ ساله 20 هزار حه‌جيێن كورد پشكدارى فه‌ريزا حه‌جێ بووينه، نێزيكى 9 هزار كه‌سان ژى ل ئيران و سوريا نه‌شێن پشكدارى ڤێ فه‌ريزێ ببن.
مه‌ريوان نه‌قشه‌به‌ندى، سه‌رپه‌رشتێ تيما راگه‌هاندن و په‌يوه‌نديێن حه‌جيێن هه‌رێمێ ل سعوديێ، بۆ ئه‌ڤرۆ نيوز گۆت: “ژ ئه‌گه‌رێ وێ كشێا سياسى يا د ناڤبه‌را كۆمارا ئيسلامى يا ئيران و سعوديێ دا، ئه‌ڤ ساله نێزيكى حه‌فت هزار كوردێن رۆژهه‌لاتێ كوردستانێ ژ حه‌جێ بێ به‌هربوون، ل سوريا ژى ژ ئه‌گه‌رێ شه‌ر و نه‌ئاراميێ نێزيكى 1800 كوردێن رۆژئاڤايێ كوردستانێ ب هه‌مان ره‌نگ نه‌شيان ئه‌ڤێ فه‌ريزێ بجهـ بگه‌هينن”.
نه‌قشه‌به‌ندى زێده‌تر گۆت: “ل گه‌ل ڤێ چه‌ندێ ژى نێزيكى 20 هزار وه‌لاتيێن كوردستانێ كو پتريا وان ژ باكوورێ كوردستانێ نه و پلا دويێ و سيێ ژى يێن هه‌رێما كوردستانێ و كوردێن ئورۆپا و ئه‌مريكانه، دێ پشكداريێ د فه‌ريزا حه‌جێ دا كه‌ن”.
سه‌رپه‌رشتێ تيما راگه‌هاندن و په‌يوه‌نديێن حه‌جيێن هه‌رێمێ ل سعوديێ سه‌رساميا خوه بۆ وێ چه‌ندێ دياركر كو تشتێ ل ده‌ڤ وى دهێته تێبينيكرن “ب تنێ سێ هزار و 656 كه‌س ل باشوورێ كوردستانێ ئازاديا وێ چه‌ندێ يا هه‌ى كو ئالايێ كوردستانێ هه‌لگرن و ب جلكێن كوردى ل سعوديێ بگه‌ريێن”.
نه‌ڤه‌شارت ژى كو ل سالێن بۆرى نێزيكى 30 هزار وه‌لاتيێن كورد ژ هه‌رچار پارچێن كوردستانێ و وه‌لاتێن ئورۆپا و ئه‌مريكا و ئۆستراليا دچوونه سعوديێ بۆ بحهئينانا ئه‌ڤێ فه‌ريزێ.