نێزیکی چار ھزار ژنێن ئێزدی د بێ سەروشوونن
ئەڤرۆنیوز، ئەمیر ئەترووشی:
سەرۆکا لژنا داکوکیکرنێ ل مافێن ئافرەتان پەرلەمانێ کوردستانێ راگەھاند، د شەرێ دژی داعش دا مەزنترین تاوان دەرحەقێ ژنێن ئێزدی دا ھاتیە کرن و گەھشتیە وی رادەی خوە دیرۆک ژی نەشێت ڤان تاوانان بنڤێسیت.
ئێڤار ئیبراھیم تایبەت بۆ ئەڤرۆ نیوز دیار کر، نھا نێزیکی چار ھەتا پێنچ ھزار کچ و ژنێن ئێزدی د دەستێ داعش دا د بێ سەروشوونن ھندەک ژ وان ھاتینە فرۆتن بۆ جھێن نەدیار، ئەڤە ژی غەدرەکا مەزن ل ڤی چینا کوردان ھاتیە کرن و دڤێت پێنگاڤێن بلەز بھێنە ھاڤێتن بۆ ئازادکرنا وان کچان و گۆت: ئەم دێ فشارێ ئێخینە سەر بەغدا و ھەرێمێ بۆ ھندێ چارەسەریەکا بلەز بۆ رزگارکرنا وان بھێتە دیتن.
ئێڤار ئاماژە دا وێ چەندێ، ب ھەڤکاری ل گەل بەغدا و ھەرێمێ نھا ئەم د گفتۆگۆیان داینە بۆ ھندێ چو بھێتە کرن ئەو کچە ھەموو سەرساخ بێ زیان ڤەگەرنە د ناڤ خێزانێن خوە دا و گۆت: ھەر چەندە ل ڤێ دووماھیێ رێژەکا باش یا کچێن ئێزدی ژی ڤەگەریاینە د ناڤ خێزانێن خوە دا.
ئەنداما پەرلەمانێ کوردستانێ خویاژی کر کو ئەو د بزاڤان دانە ئەو ژنێن ھاتینە ئازادکرن ژی کار ل سەر بھێتە کرن کو ژ حالەتێ خوە یێ دەروونی قورتال ببن، چونکو ب دیتنا ئێڤار خانێ رەوشا وان یا دەروونی گەلەک تێکچوویە و پێدڤی ب چارەسەریێ نە.
