نێچيرڤان بارزانى:دێ مه‌شقێ كه‌ينه ستراتيژ وگوهۆرين ژ وێ ده‌ست پێ دكه‌ت
ئه‌ڤرۆنيوز:
سه‌رۆك وه‌زيرێن هه‌رێما كوردستانێ راگه‌هاند، ئارمانجا حوكمه‌تا هه‌رێمێ مه‌شقێ بكه‌ته ستراتيژ ودچارچۆڤێ پێشڤه‌برنا مرۆڤى دا جهێ خوه بگريت، چونكى گوهۆرين ژ وێ ده‌ست پێ دكه‌ت.
نێچيرڤان بارزانى سه‌رۆك وه‌زيرێن هه‌رێما كوردستانێ، ئه‌ڤرۆ سێشه‌مبى 12/12/2017، ل رێ وره‌سمێن ڤه‌كرنا ئاڤاهيێ نوو يێ ئه‌نستيتيۆتا كوردستان بۆ كارگێريا گشتى، گۆتاره‌ك پێشكێشكر وگۆت” ئه‌نستيتيۆتا كوردستان دێ هاريكاره‌كا سه‌ره‌كى يا حوكمه‌تێ يه، مه‌شقێ دێ كه‌ته ستراتيژى بۆ پێشخستنا حوكمه‌تێ وئاستێ كارگێرى ل ده‌زگه‌هێن حوكمه‌تێ دێ بلند كه‌ت”.
پرۆژێ پێكئينانا ئه‌نستيتيۆتا كوردستان ب هه‌ڤپشكى دناڤبه‌را حوكمه‌تا هه‌رێما كوردستانێ وكوربا باشوور هاتيه بجهئينان، ل دۆر وێ چه‌ندێ نێچيرڤان بارزانى راگه‌هاند” كوريا باشوور به‌رده‌وام يا سه‌لماندى كو دۆستا گه‌لێ كوردستانێ يه ودده‌مێ سالێن بۆرى دا، به‌رده‌وام ده‌ستێ دۆستايه‌تيێ بۆ هه‌رێما كوردستانێ درێژكريه، گه‌لێ كورد ژى به‌ده‌وام هاريكاريێن كوريا باشوور ل به‌رچاڤ وه‌ردگريت وچو جاران ژبير ناكه‌ت”.
