نێچيرڤان بارزانى به‌حس ل كۆمبوونا خوه يا گه‌ل عه‌بادى دكه‌ت
ئه‌ڤرۆ نيوز:
نێچيرڤان بارزنى، سه‌رۆك وه‌زيرێن هه‌رێما كوردستانێ راگه‌هاند كو ل گه‌ل عه‌بادى دانوستاندن ل سه‌ر چه‌ند پرسان كريه و ژ وان ژى ڤه‌كرنا ئه‌وان رێيێن ماوه‌يه‌كه هاتينه داخستن.
رۆژا دوشه‌مبى 30-7-2018 ل بەغدا، حەیدەر عەبادی، سەرۆک وەزیرێن عێراقێ پێشوازی ل نێچیرڤان بارزانی، سەرۆک وەزیرێن هەرێما کوردستانێ کر و چەند پرسه‌ك گه‌نگه‌شه كرن.
پشتى ب دووماهى هاتنا كۆمبوونا وان د داخۆيانيه‌كێ دا بۆ كه‌نالێ عيراقيه، نێچيرڤان بارزانى، راگه‌هاند كو د كۆمبوونا وان دا كۆمه‌كا بابه‌تان هاتنه به‌حسكرن و هنده‌ك د تايبه‌ت بوون ب په‌يوه‌نديێن ناڤبه‌را هه‌رێما كوردستانێ و به‌غدا و ژ وان ژى ڤه‌كرنا رێيا هه‌ولێر – كه‌ركووك و دهۆك – مووسل ديسا رێيا ناڤبه‌را شنگال – دهۆك.
نێچيرڤان بارزانى گۆتژى: “هه‌روه‌سا به‌حس ل په‌يوه‌نديێن ناڤبه‌را هه‌رێما كوردستانێ و به‌غدا هاته كرن و ته‌كست ل سه‌ر وێ چه‌ندێ كر كو پێدڤيه هه‌موو بزاڤان بێخنه گه‌ر بۆ چاره‌كرنا كێشێن ناڤبه‌را هه‌ولێر و به‌غدا ل سه‌ر بنه‌مايێ دستوورى”.
ده‌رباره‌ى پرسا پێكئينانا حوكمه‌تا نوو يا عيراقێ ژى، سه‌رۆك وزه‌يران گۆت: “هه‌ر وه‌كو دزانن پرۆسا هه‌لبژارتنان ب رێڤه چوو، نوكه چاڤه‌رێ په‌سه‌ندكرنا ئه‌نجامان دهێته كرن ژ لايێ دادگه‌ها بلندا فيدرال ڤه. دووپات دكه‌م كو پێدڤيه له‌ز د پێكئينانا حوكمه‌تێ دا بهێته كرن”.
ل دۆر هه‌رێما كوردستانێ ده‌رباره‌يى پۆستێ سه‌رۆك وه‌زيرێن نوو يێن عيراقێ، نێچيرڤان بارزانى دبێژيت: “مه ڤيتۆ ل سه‌ر چو كه‌سه‌كى نينه و ته‌كست ل سه‌ر وێ چه‌ندێ ژى كريه. ئه‌ڤا ل ده‌ف مه گرنگ پێكئينانا مه‌زنترين كوتله‌يه، كو خزمه‌تا به‌رژه‌وه‌نديێن هه‌موو گه‌لێ عيراقێ بكه‌ت. دروستكرنا مه‌زنترين كوتله دڤێت ته‌كست ل سه‌ر پێشكێشكرنا خزمه‌تگۆزاريان بهێته كرن و ئابوورێ وه‌لاتێ به‌ر ب پێش بچيت و كوتله‌يه‌ك بيت بشێت ده‌رفه‌تێن كارى بۆ گه‌نجێن عيراقێ دابين بكه‌ت.
