نێچيرڤان بارزانى بۆ رۆيترز: دربێن ئه‌سمانى ب تنێ داعش ژ ناڤ نابه‌ن
ئه‌ڤرۆ نيوز:
نێچيرڤان بارزانى، سه‌رۆكێ حوكمه‌تا هه‌رێما كوردستانێ هوشدارى دا، كو هێرشێن ئه‌سمانى يێن هێزێن هه‌ڤپه‌يمانان ب تنێ به‌س نينن بۆ ژناڤبرنا داعش، د سه‌ر وێ چه‌ندێ را كو سه‌ركه‌فتن يێن تۆمار كرين و پێش بينى كر كو بهارێ ده‌ست ب ئازادكرنا مووسل ناهێته كرن، ئاماژه ب وێ چه‌ندێ ژى كر كو داعش دێ مه‌ترسى بيت بۆ سه‌ر ده‌رڤه‌رێ و جيهانێ بۆ چه‌ند سالان.
نێچيرڤان بارزانى سه‌رۆكێ حوكمه‌تا هه‌رێما كوردستانێ د ديدارا خوه يا ل گه‌ل رۆيترز دا خۆيا كر كو حه‌يده‌ر عه‌بادى كه‌سه‌كێ پراگماتيكى يه، مه‌زنترين كێشه ل هه‌مبه‌ر وى، نورى مالكى يه و گۆت: “ئێدى چو وه‌لاتێ ئێك پارچه‌يى نه‌مايه كو ناڤێ وى عيراق بيت و هه‌كه چارچۆڤه‌ك بۆ پێكڤه‌ژيانێ نه‌هێته دانان دێ خوينا زێده‌تر هێته رێتن”.
بارزانى دياركر كو پێشبينيێن ژناڤچوونا رێكخراوا تۆندره‌و د سنوردارن ژ ئه‌نجامێ شه‌رێ سه‌پاندى ل سوريا و ديارنه‌مانا له‌شكرێ عيراقى وه‌كو هێزه‌كا كاريگه‌ر ل سه‌ر ئه‌ردى ل گه‌ل كێماسيێن پێدڤيێن چه‌كى يێن هێزێن پێشمه‌رگه‌يى ل كوردستانێ و گۆت: “داعش نوكه سيسته‌مه‌كێ رێكخستى يێ هوور هه‌يى و دێ ب سالان مه‌ترسى بيت ل سه‌ر ده‌ڤه‌رێ و جيهانێ.
نێچيرڤان بارزانى گۆت: “ئه‌ڤ شه‌ره يێ درێژه. ل سه‌ر زێده‌ترى 15 مليۆن كه‌سايه ل عيراقێ و سوريا”. زێده‌تر گۆت: “نوكه داعش ژناڤچوويه و كونترۆل ل سه‌ر هاتيه كرن، به‌لێ هێشتا د شيانێن وێ دا هێرشان بكه‌ت”. پێڤه‌چوو و گۆت: “ئه‌و د رێكخستى نه و شيانێن نووبوونا ئه‌ندامێن خوه هه‌يه ژ هه‌موو ده‌ڤه‌رێن جيهانێ، هه‌يكه‌لێ وێ وه‌سان هاتيه چێكرن يێ پاراستى بيت”.
د سه‌ر وێ چه‌ندێ را ته‌كست كر: “يا ڤه‌بڕى يه كو ب دربێن ئه‌سمانى ب تنێ ئه‌ڤ رێكخستيه ژ ناڤ ناچيت، بۆ ژناڤبرنا ڤێ رێكخستيێ پێدڤى ب هێزێن تايبه‌ته، نه له‌شكرێ نورمال ل سه‌ر ئه‌ردى، به‌لكو كريارێن له‌شكرى يێن هه‌ڤپشك يێ كوشتنێ ل گه‌ل پێشمه‌رگه‌يى”.
ده‌رباره‌يى مووسل ژى دا زانين كو كورد يێ شه‌رێ داعش دكه‌ن ژ پێخه‌مه‌ت وان ده‌ڤه‌رێن گرێدايى كوردان و نه‌ڤێت پێشمه‌رگه ل پێشيا له‌شكرى بيت بۆ ئازادكرنا مووسل و گۆت: “مه دڤێت دوورى ململانێ بين ل عيراقێ”.
ئاماژه ب وێ چه‌ندێ ژى كر كو ئه‌و پێشبينى ناكه‌ت هێرشا رزگاركرنا مووسل ل ئادارێ ده‌ست پێ بكه‌ت و پێشبينى دكه‌ت بچيته ئيلۆنێ يان چريا ئێكێ.
