نێچيرڤان بارزانى: حوكمه‌تێ خوه كريه به‌رپرس ژ دابينكرنا هه‌ر تشتى و نه‌شێت هه‌موويان بكه‌ت
ئه‌ڤرۆ نيوز:
نێچيرڤان بارزانى سه‌رۆكێ حوكمه‌تا هه‌رێمێ راگه‌هاند، حوكمه‌تا هه‌رێمێ خوه كريه به‌رپرس ژ هه‌موو پێدڤيان و نه‌شێت بجهـ بينيت، ژ به‌ر هندێ داخواز كر د رێيا پشته‌ڤانيكرنا كه‌رتێ تايبه‌ت دا وێ كێشێ چاره بكه‌ت.
ئه‌ڤ گۆتنێن نێچيرڤان بارزانى د چارچۆڤێ گۆتنه‌كێ دا هاتن كو ئه‌ڤرۆ ل كۆنفرانسێ نه‌خۆشيێن دلى ل هه‌ولێرێ پێشكێشكر.
نێچيرڤان بارزانى ده‌رباره‌ى كێم و كاسيێن كه‌رتێ ساخله‌ميێ ل هه‌رێما كوردستانێ كر و ئاماژه ب وى سيسته‌مى كر كو ژ مێژه ل هه‌موو عيراقێ دهێته په‌يره‌و كرن و پێدڤيه بهێته گوهۆڕين.
د ڤێ ده‌ربارێ دا، ئاماژه ب سيسته‌مێ سوسياليستێ ساخله‌ميێ ل عيراقێ و هه‌رێما كوردستانێ كر و داخواز ژ سه‌نديكا نوشداران كر كو خه‌مخوريێ د گوهۆڕينا سيسته‌مێ ساخله‌ميێ دا بكه‌ن و پێداچوونێ د هه‌موو سيسته‌مى دا بكه‌ن ب تايبه‌ت د هه‌ردو وارێن قانوونى و كاركێرى.
گۆتژى: “حوكمه‌تێ خوه كريه به‌رپرسيارا هه‌موو پێدڤيێن نوشدارى، به‌لێ نه‌شێت بجهـ بينيت، سيسته‌مه‌كێ كه‌ڤنێ سوسياليستى يێ سه‌رده‌مێ سه‌دامى يه، ل هه‌موو عيراقێ ئه‌ڤ كێشه‌يا مه‌زن هه‌يه و پێدڤيه ئه‌ڤ هزره بهێته گوهۆڕين و كه‌رتێ تايبه‌ت پشته‌ڤانيێ لێ بكه‌ت”.
سه‌رۆكێ حوكمه‌تێ د درێژاهيا ئاخفتنێن خوه دا رووناهى خسته سه‌ر بزاڤێن كارمه‌ندێن ساخله‌ميێ كو سه‌ربارى ره‌وشا خرابا دارايى نه‌هێلايه ئه‌ڤ كه‌رته بۆ پێشكێشكرنا خزمه‌تێن ساخله‌ميێ ژ كار بكه‌ڤيت.
بۆ ڤێ وارى ژى ئاماژه ب شه‌ڤ و رۆژێن كاركرنا وان كر ب تايبه‌ت بۆ پێشكێشكرنا خزمه‌تێن ساخله‌ميێ كو ئاوارێن ئه‌ڤێ دووماهيێ يێن پارێزگه‌ها نه‌ينه‌وا كر و داخواز ژ به‌غدا كر كو د ڤێ ده‌ربارێ دا پشته‌ڤانيا هه‌رێمێ بكه‌ت و پێدڤيى ب هاريكاريا زێده‌تر يا ساخله‌ميێ بۆ ئاواران هه‌يه.
ل دووماهيێ ژى نێچيرڤان بارزانى گۆت: “سۆپاس بۆ هه‌ر ئێك ژ وه‌لاتێن ئيماراتا ئێكگرتى يا عه‌ره‌بى و كوێت و ئوردن كو د ڤێ ده‌ربارێ دا هاريكاريا هه‌رێما كوردستانێ كريه”.