نێچيرڤان بارزانى دێ ل گه‌ل دۆنالد تره‌مپی كۆم بیت
ئەڤرو نیوز:
به‌رێز نێچيرڤان بارزانى، سه‌رۆكێ هه‌رێما كوردستانێ ب داخوازنامەکا فه‌رمى دێ پشکداریێ د كۆڕبه‌ندێ ئابووری یێ جيهانی ل داڤۆس کەت، کو دێ ل ڕۆژانێن 21 هەتا 24 ڤێ هەیڤێ دا ل يادا پێنجی سالیا دامه‌زراندنا وێ دا برێڤە چیت و تێدا ب ناڤونيشانا ژ پێناڤێ جیھانەکا ئێکگرتی گەشەسەندنا بەردەوام دا، دێ تيشكێ ئێخیتە سه‌ر پرسێن جيهانی یێن تايبه‌ت ب ئابوورى و سياسه‌تێ و ئاسايشێ و سه‌قامگيریێ.
د وێ پشکداری کرنێ دا سه‌رۆك نێچيرڤان بارزانى دێ ل گه‌ل به‌ڕێزان دۆنالد تره‌مپ سه‌رۆكێ ئه‌مريكا و ئه‌نتۆنيۆ گۆتێرێز، سكرتێرێ گشتی یێ نه‌ته‌وێن ئێکگرتی و هژماره‌كا له سه‌ركرده و وه‌زيران و به‌رپرسێن بلند یێن وەلاتان كۆم بیت، د وان كۆمبوونان دا په‌ره‌پێدانا په‌يوه‌نديێن هه‌رێما كوردستانێ ل گه‌ل جڤاکێ نێفده‌وله‌تى و سياسه‌ت و هه‌لویستێ هه‌رێم و گوهۆرینا بيرورا ده‌رباره‌ى پرسێن هه‌رێمى و جيهانی دێ هێنە گوتۆبێژ کرن.
هه‌ر د وێ پشکداريكرنێ دا، سه‌رۆك نێچيرڤان بارزانی د روونشتنەکا داڤۆس دا ب ناڤونيشانا “ڕۆژهه‌لاتا ناڤین یا نەسه‌قامگير” دێ ئاخڤیت، تێدا دێ لێكه‌فتێن درێژخايه‌ن و ئاڵۆزیێن به‌رده‌وام یێن ڕۆژهه‌لاتا ناڤین، کو بووینە ژێدەرێ ترسێ و نيگه‌رانيا مەزن یا جيهانى و دەڤەرێ دێ هێنە بەحس کرن و دێ تيشكێ ئێخیتە سه‌ر كاريگه‌ریێن ستراتيژيا قه‌يرانا نوکە ل سه‌ر ئاشتى و سه‌قامگيریێ ل كه‌نداڤی، عیراق و سووريێ.
