نێچيرڤان بارزانى ل هه‌ولێر دێ ل گه‌ل د. به‌رهه‌م سالح كۆم بيت
ئه‌ڤرۆ نيوز:
ئاخفتنكه‌رێ ب ناڤێ جڤاتا سه‌ركرداتيا پارتى ديموكراتى كوردستان راگه‌هاند كو سه‌ره‌دانا شاندێ پارتى بۆ لايێ هه‌ڤپه‌يمانيێ هاته پاشخستن. ئه‌ندامه‌كێ جڤاتا گشتى يا هه‌ڤپه‌يمانيێ ژى دده‌ته دياركرن كو نێچيرڤان بارزانى و به‌رهه‌م سالح دێ ل هه‌ولێر كۆم بن.
عه‌تا شێخ حه‌شه‌ن، ئاخفتنكه‌رێ ب ناڤێ جڤاتا سه‌ركرداتيا پارتى ديموكراتى كوردستان بۆ رووداو راگه‌هاند كو بڕيار بوو ئه‌ڤرۆ شانده‌كێ مه‌كته‌با سياسى يا پارتى ديموكراتى كوردستان ب سه‌رۆكاتيا نێچيرڤان بارزانى جێگرێ سه‌رۆكێ پارتى ديموكراتى كوردستانێ سه‌ره‌دانا هه‌ڤپه‌يمانيێ بۆ ديموكراسى و دادپه‌روه‌ريێ بكه‌ت، به‌لێ سه‌ره‌دان هاته پاشخستن.
سه‌باره‌ت ب ئه‌گه‌رێن پاشخستنێ عه‌تا شێخ حه‌سه‌ن گۆت: “هه‌ر ده‌مێ داخوازا كۆمبوونێ ژ پارتى بهێته كرن، د پێناڤى ئێكرێزيا نشتيمانى دا ئاماده‌يى هه‌موو كۆمبوونانين، پاشخستنا كۆمبوونێ بۆ ده‌مه‌كێ دوور نينه و ب پشت راستى ژى د داهاتيه‌كێ نێزيك دا ل گه‌ل هه‌ڤپه‌يمانيێ و پتريا پارتيان كۆم بن”.
حه‌سه‌ن بارام، ئه‌ندامێ جڤاتا گشتى يێ هه‌ڤپه‌يمانيێ بۆ رووداو گۆت: “بڕيار بوو شانده‌كێ بلندێ پارتى سه‌ره‌دانا سلێمانيێ بكه‌ت و ل گه‌ل گۆڕان و هه‌ڤپه‌يمانيێ كۆم ببيت، به‌لێ كۆمبوون هاته پاشختن، نوكه به‌رهه‌م سالح ل باژێرێ هه‌ولێرێ يه و ل گه‌ل نێچيرڤان بارزانى، سه‌رۆك وه‌زيرێن هه‌رێما كوردستانێ و جێگرێ سه‌رۆكێ پارتى ديموكراتى كوردستان كۆم ببيت”.
ده‌رباره‌يى ده‌مێ كۆمبوونێ ژى حه‌سه‌ن بارام گۆت: “هێشتا نه‌هاتيه دياركرن كا دێ كه‌نگى كۆم بن، به‌لێ ره‌نگه سوبه‌هى رۆژا ئێكشه‌مبى كۆمبوون بهێته كرن”.
پشتى په‌سه‌ندكرنا ئه‌نجامێن هه‌لبژارتنێن جڤاتا نوونه‌رێن عيراقێ، پارتى و ئێكه‌تى سه‌ره‌دان بۆ لايه‌نێن سياسى ده‌سپێكريه و هه‌تا نوكه ئێكه‌تيێ سه‌ره‌دانا گۆڕان و هه‌ڤپه‌يمانى و ئێكگرتۆ و كۆمه‌لا ئيسلامى كريه و پارتى ژى سه‌ره‌دانا ئێكگرتوو كريه.
