نێچیرڤان بارزانی ب فەرمی بۆ وەلاتێ قەتەرێ دهێتە ڤەخواندن
نێچیرڤان بارزانی، سەرۆكێ هەرێما كوردستانێ، دوهی پێشوازی ل حسێن بن عەلی ئەلفەزالە، قونسلێ گشتییێ قەتەرێ ل هەرێما كوردستانێ كر.
د دیدارەكێ دا ئەلفەزالە، بانگهێشتنامەكا محەمەد بن عەبدولڕەحمان ئال سانی، سەرۆكوەزیرێن قەتەرێ بۆ پشكداریكرنێ د كارێن كۆڕبەندێ دەوحە دا، گەهاندە نێچیرڤان بارزانی كو بڕیارە ل مەها دوازدە ب چاڤدێرییا شێخ تەمیم بن حەمەد ئال سانی، میرێ قەتەر بهێتە گێڕان.
سەرۆكێ هەرێما كوردستانێ زێدەباری سوپاس و پێزانین بۆ وێ بانگهێشتێ، ئامادەیا خۆ نیشا دا كو پشكدارییێ د وی كۆڕبەندی دا بكەت، هەروەسا تەكەزی ل سەر خواستا هەرێما كوردستانێ بۆ پێشڤەبرنا پەیوەندییان و بەرفرەهكرنا هاریكاریێن هەڤپشك ل گەل قەتەرێ كر.
قونسلێ گشتییێ قەتەرێ دوپاتكر كو سەركرداتییا وەلاتێ وی، ب گرنگیڤە بەرێخۆ ددەتە پەیوەندییان ل گەل ئیراقێ و هەرێما كوردستانێ و دخوازن د هەموو بیاڤان دا ئاستێ پەیوەندییان پێشڤە ببەن.
هەر دوهی سەرۆكێ هەرێما كوردستانێ، د دیدارەكێ دا ل گەل بالیۆز ماهر ئەلكەرەكی، قونسلێ گشتییێ نوو یێ فەلەستینێ ل هەرێما كوردستانێ، زێدەباری پیرۆزباهییێ بۆ دەستبكاربوونا وی، هەموو پشتەڤانییا لایەنێن پەیوەندیدار بۆ سەرئێخستنا ئەركێ وی نیشا دا، هەروەسا خواستا هەرێما كوردستانا بۆ پێشڤەبرنا پتر یا پەیوەندییان ل گەل فەلەستینێ دوپاتكر.
هەروەسا ئەلكەرەكی، خۆشحالییا خۆ بۆ دەستبكاربوونێ وەكو قونسلێ وەلاتێ خۆ ل هەرێما كوردستانێ دەربڕی و گۆت: (فەلەستین ب گرنگیڤە بەرێخۆ ددەتە پەیوەندییێن خۆ ل گەل هەرێما كوردستانێ و خواستا وەلاتێ خۆ بۆ بهێزكرنا زێدەتر یا پەیوەندییان د هەموو بیاڤان دا ل گەل هەرێما كوردستانێ دوپاتكر).
