نێچیرڤان بارزانی دوپاتی ل گرنگییا هەلبژارتنان و سەرئێخستنا پڕۆسەیا دەنگدانێ بۆ هەرێما كوردستانێ كر
سەرۆكێ هەرێما كوردستانێ راگەهاند، د هەلبژارتناندا گەلێ كوردستانێ یێ سەركەفتییە و دڤێت هەموو ئالی بزاڤێ بكەن هەلبژارتن د سەقایەكێ ئارامدا بهێنە ئەنجامدان.
دوهی دوشەمبی 2/9/2024، نێچیرڤان بارزانی، سەرۆكێ هەرێما كوردستانێ پێشوازی ل كلاوس شترایشەر، قۆنسلێ گشتیێ بەرێ و ئالبرێشت فۆن ڤیتكە، قۆنسلێ گشتیێ نوو یێ ئەلمانیا ل هەرێما كوردستانێ كر.
سەرۆكایەتییا هەرێما كوردستانێ د بەیاننامەیەكێدا بەلاڤكر» د دیدارەكێدا سەرەرای دەربڕینا سوپاسی و پێزانینان بۆ كار و ئەركێ قۆنسلێ گشتیێ بەرێ یێ ئەلمانیا، خاتر خاستن لێكر و هیڤییا سەركەڤتنێ د ئەركێ وی یێ نوو دا بۆ خواست، هەروەسا ب خێر هاتنا قۆنسلێ گشتیێ نوو یێ ئەلمانیا ل هەرێما كوردستانێ كر و هەموو پشتەڤانییەكا ئالیێن پەیوەندیدارێن هەرێما كوردستانێ بۆ سەرئێخستنا ئەركێ وی نیشاندا.
ژ ئالیێ خوەڤە قۆنسلێ گشتیێ بەرێ یێ ئەلمانیا ل هەرێما كوردستانێ خوەشحالییا خوە ب دەمێ كاركرنێ ل هەرێما كوردستانێ دیاركر و پشتەڤانییا ئالیێن پەیوەندیدار بۆ سەرئێخستنا ئەركێ وی بلند هەلسەنگاند.
قۆنسلێ گشتیێ نوو یێ ئەلمانیا ژی سەرەرای نیشاندانا خوەشحالییا خوە ب دەستبكاربوونێ، پشتەڤانی و خواستا وەلاتێ خوە بۆ پێشڤەبرنا پەیوەندییان ل گەل هەرێما كوردستانێ دووپاتكر.
د دیدارێدا باس ل رەوشا ئیراقێ و هەرێما كوردستانێ و هەلبژارتنێن پەرلەمانێ كوردستانێ هاتە كرن. سەبارەت ئەوێ چەندێ نێچیرڤان بارزانی دوپاتی ل گرنگییا هەلبژارتنان و سەرئێخستنا پڕۆسەیا دەنگدانێ بۆ هەرێما كوردستانێ كر و گۆت» د هەلبژارتناندا گەلێ كوردستانێ یێ سەركەفتییە و هەموو ئالی دڤێت بزاڤێ بكەن هەلبژارتن د سەقایەكێ ئارامدا بهێنە ئەنجامدان».
دووماهی پێشهاتیێن دەڤەرێ ب گشتی، تەوەرەكێ دی یێ دیدارێ بوو.
