نێچیرڤان بارزانی سوپاسیا شانده‌كێ نوشدارێن خۆبه‌خش دكه‌ت
ئه‌ڤرۆ نیوز:
نێچیرڤان بارزانی سه‌رۆك وه‌زیرێن هه‌رێما كوردستانێ ئه‌ڤرۆ پێشوازی ل شانده‌كێ رێكخراوا GSMSG یا ئه‌مریكی یا خۆبه‌خش كر كو ژ هژماره‌كا نوشدارێن بسپۆر و نشته‌رگه‌ر پێكهاتبوو و حه‌فتیه‌كه ل كه‌مپێن ئاواره و په‌نابه‌ران خزمه‌تكاریێن ساخله‌میێ پێشكێش دكه‌ن.
شاندێ مێهڤان به‌حسێ كار و پرۆژێن خوه ل هه‌رێما كوردستانێ كر و رۆلێ خه‌لكێ كوردستانێ د رووبرووبوونا داعش و حه‌واندنا هژماره‌كا زۆر یا ئاواره و په‌نابه‌ران و ئارامی و پێكڤه‌ژیانێ دا بلند هه‌لسه‌نگاند، له‌ورا ب باش زانیه بهێن د وارێ نوشداری دا خزمه‌تان پێشكێش بكه‌ن.
ژ ئالیێ خوه ڤه نێچیرڤان بارزانی سه‌ره‌رای ده‌ستخۆشیێ بۆ ڤی كاری مرۆڤایه‌تی، سوپاسیا وان كر و هیڤی خواست ل سه‌ر ڤان كاران به‌رده‌وام بن و پشته‌ڤانیا حوكمه‌تا هه‌رێما كوردستانێ ژی بۆ پرۆژێ وان دوپاتكر.
