نێچیرڤان بارزانی ل گەل شاندەكێ ئاشۆرییێن ئەمریكا كۆمبوو
دوهی ئێكشەمبی 14/9/2025، نێچیرڤان بارزانی، سەرۆكێ هەرێما كوردستانێ پێشوازی ل شاندەكێ ئاشووریێن ئەمریكا ب سەرۆكاتییا سام دەرمۆ، سەرۆكێ دەزگەهێ ئاشۆرییان ژ پێخەمەت دادوەریێ كر كو ژ هەمارەكا كەساتیێن دیار یێن جڤاتا ئاشووریێن ئیراقێ و هەرێما كوردستانێ ل ئەمریكا پێكهاتبوو.
سەرۆكاتییا هەرێما كوردستانێ د بەیاننامەیەكێ دا بەلاڤكر» د دیدارەكێدا رەوشا ئاشۆرییان و پێكهاتەیان ل ئیراقێ ب گشتی و هەرێما كوردستانێ ب تایبەتی هاتە گەنگەشەكرن و ل دۆر رۆل و پێگەهـ و بەرهەڤی و نوكە و پاشەڕۆژا ئاشوورییان و پێكهاتەیان ل هەرێما كوردستانێ، بیر و بۆچوون هاتنە لێكگۆهارتن».
د بەیاننامەیا سەرۆكاتییا هەرێما كوردستانێ هاتیە ژی» شاندێ ئاشۆریێن ئەمریكا پێكڤەژیان و هەڤدوقەبوولكرنا د ناڤبەرا پێكهاتەیاندا ل هەرێما كوردستانێ بلند هەلسەنگاند و رێزا خوە ژی بۆ وێ چەندە دوپاتكر، هەروەسا سوپاسییا هەرێما كوردستانێ كر بۆ پشتەڤانی و هاریكارییا ل پشتی سالا 2003 ل هەرێما كوردستانێ وەك پەناگەهەكا ئارام بۆ ئاشۆرییان و پێكهاتەیان ب گشتی، پێشكێشكر».
ژ ئالیێ خوەڤە سەرۆكێ هەرێما كوردستانێ، سەرەرای نیشادانا خوەشحالییا خوە، سەرەدانا شاندێ ناڤبری بۆ هەرێما كوردستانێ ب گرنگ و پێدڤی بۆ كارێ هەڤپشك هەژمارت و دوپاتی ل سیاسەت و هەلوەستێ نەگهۆر یێ هەرێما كوردستانێ د پاراستنا پێكهاتەیان و كەلتوورێ پێكڤەژیانێ كر، هەروەسا رۆل و هەڤپشكییا ئاشۆرییان و پێكهاتەیێن دی ل هەموو وارێن ژیانێ ل هەرێما كوردستانێ بلند هەلسەنگاند.
بەرهەڤی و پشكدارییا رەڤەندا ئاشۆری و پێكهاتەیان ل ئەرمیكا و دەرڤەی وەلاتی ب گشتی، تەوەرەكێ دی یێ كۆمبوونێ بوو.
