نێچیرڤان بارزانی: هەموو پشتەڤانیەكێ ل ماف و داخوازیێن ڕەوا یێن پالەیان دكەین
ئەڤرۆ
سەرۆكێ هەرێما كوردستانێ، نێچیرڤان بارزانی ب هەلكەفتا ڕۆژا جیهانی یا پالەیان، دوهی دوشەمبی ئێكێ ئەیارێ پەیامەك بەلاڤكر و ڕاگەهاند: هەموو پشتەڤانیەكێ ل ماف و داخوازیێن ڕەوا یێن پالەیان دكەین».
نێچیرڤان بارزانی د پەیاما خوە دا دبێژیت» ئێكێ ئەیارێ ڕۆژا جیهانی یا پالەیان، ب گەرمی ل پالەیێن كوردستانێ، ئیراقێ و جیهانێ و سەندیكا و ڕێكخراوێن وان یێن پیرۆز دكەم. پشكداری و قوربانیدانا پالەیێن كوردستانێ د شۆڕەشێ دا وڕۆل و زەحمەتا وان یا مەزن د پرۆسەیا ئاڤەدانكرنا كوردستانێ دا بلند د هەلسەنگینم و هیڤیا سەركەفتنێ بۆ دخوازم».
گوت ژی» ب ڤێ هەلكەفتێ سەرەرای دەربرینا هەموو پشتەڤانیەكێ بۆ ماف و داخوازیێن ڕەوا یێن پالەیان، دووپاتیێ ل پێدڤیا هەبوونا قانوونەكا سەردەمیانە یا كاری بۆ پاراستنا مافێن پالەیان و پەیدایكرنا ئامرازێن سلامەتیێ و ژینگەهەكا گونجای و ڕێكخستنا دروست یا ساتێن كاری و یەكسانی د دەلیڤەیێن كاری دا دكەین، هەروەسا پێدڤیە گرنگیەكا زێدەتر ب ژیارا پالەیان وخێزانێن وان بهێتە دان و سەندیكا و ڕێكخراوێن پالەیان ژی كاراتر بۆ مافێن وان كار بكەن».
