نێچیرڤان بارزانی و سۆدانی دوپاتی ل سەر بەردەوامییا هەماهەنگی و هاریكارییا هەولێرێ و بەغدایێ كر
دوهی چارشەمبی 16/4/2025 ل سلێمانیێ، نێچیرڤان بارزانی، سەرۆكێ هەرێما كوردستانێ ل گەل محەمەد شیاع سۆدانی، سەرۆك وەزیرێن ئیراقێ كۆمبوو.
سەرۆكایەتییا هەرێما كوردستانێ د بەیاننامەیەكێدا ل دۆر كۆمبوونێ بەلاڤكر» د كۆمبوونێدا رەوشا سیاسی و گشتی یا وەلاتی و دۆسییێن هەڤپشك هاتنە گەشنگەشەكرن و دوپاتی ل سەر بەردەوامییا هەماهەنگی و هاریكارییا هەولێر – بەغدا، هەروەسا ب هێزكرنا هاریكارییا د ناڤبەرا هێزێن نیشتمانی بۆ پاراستنا ئارامیێ هاتە كرن، ب شێوەیەكی كو خزمەتا ئێكڕێزییا نیشتمانی و بەرژەوەندیێن بلند یێن وەلاتی بكەت و هاریكار بیت بۆ بزاڤێن حوكمەتا فیدرال د بجهئینانا گەشەپێدانێ ل سەرانسەری ئیراقێ».
سەرۆكایەتییا هەرێما كوردستانێ دیاركر ژی» نێچیرڤان بارزانی، داكۆكی ل گرنگییا مسۆگەركرنا ماف و شایستەیێن دستووری یێن هەرێما كوردستانێ كر، هەروەسا پێگیرییا هەرێما كوردستانێ بۆ ب هێزكرنا هاریكارییا ئاڤاكەر ل گەل حوكمەتا فیدرال بۆ چارەسەركرنا هەموو پرسان دوپاتكر، ب جۆرەكی كو هاریكار بیت د ب هێزكرنا تێكگەهشتنێ و هەڤپشكیێ د ناڤبەرا هەردو ئالییاندا و هەڤسەنگی و ئارامییا وەلاتی بپارێزیت».
د بەیاننامەیا سەرۆكایەتییا هەرێمێدا هاتیە ژی» دوماهی پێشهاتێن دەڤەرێ و رەوشا هەرێمی و نێڤدەولەتی و كاریگەریێن وێ ل سەر ئیراقێ، تەوەرەكێ دی یێ كۆمبوونێ بوو. تێدا دوپاتی ل سەر پێدڤییا دووركەفتنا ئیراقێ ژ ململانێیان و پشتەڤانییا وان دەستپێشخەرییان هاتە كرن كو رێكا چارەسەرییا ئاشتییانە ودیالۆگێ دگرنە بەر بۆ چارەسەركرنا كێشە و ئالۆزیێن دەڤەرێ».
