نێچیرڤان بارزانی و مەسرور بارزانی پیرۆزباهییێ ل پاتریاركێ نوی یێ كلدانان ل جیهانێ دكەن
د دو پەیامێن جودا دا، نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ، پیرۆزباهی ل مار (پۆلسێ سێیێ نۆنا) كر، ب هەلكەفتا هەلبژارتنا وی وەك پاتریاركێ نوو یێ كەنیسەیا كلدانی ل جیهانێ.
نێچیرڤان بارزانی، سەرۆكێ هەرێما كوردستانێ، د پەیاما خۆ دا گەرمترین پیرۆزباهی ئاراستەی پاتریاركێ نوو كرن و هیڤییا سەركەفتنێ د ئەركێ وی یێ پیرۆز دا بۆ خواست. سەرۆكێ هەرێمێ، مار پۆلسێ سێیێ نۆنا وەك كەسایەتییەكێ ئایینی یێ ناڤدار و خودان ئەزموونەكا دەولەمەند وەسف كر و هیڤی خواست هەلبژارتنا وی ببیتە ئەگەرێ كووركرنا پتر یا گیانێ لێبۆرینێ و پێكڤەژیانێ د ناڤبەرا هەموو پێكهاتەیان دا. هەروەسا دووپات كر كو هەرێما كوردستانێ دێ وەك جهەكی پاراستی بۆ هەموو ئایین و نەتەوەیان مینیت و پشتەڤانییا تمام بۆ پاراستنا ماف و ناسنامەیا كریستیانان ل هەرێمێ و ئیراقێ نیشان دا.
ژ ئالیێ خۆ ڤە، مەسرور بارزانی سەرۆكێ حوكمەتا هەرێما كوردستانێ، د پەیامەكێ دا ب هەلكەفتەكا گرنگ دانا و هیڤییا سەركەفتنێ د ڤێ بەرپرسیارییا مەزن دا بۆ پاتریاركێ نوو خواست. سەرۆكێ حوكمەتێ ئاماژە ب وێ چەندێ كر كو هەرێما كوردستانێ شانازییێ ب پێگەهێ خوشك و برایێن كلدانی و هەموو كریستیانان دكەت. هەروەسا دووپات كر كو حوكمەت پێگیرە ب هێزكرنا كولتۆرێ پێكڤەژیانا ئاشتییانە د ناڤبەرا پێكهاتەیێن جودا یێن هەرێما كوردستانێ دا.
سەرۆكێ هەرێمێ و سەرۆكێ حوكمەتا هەرێمێ د پەیامێن خۆ دا دووپاتی ل سەر پاراستنا مافێن پێكهاتەیان و بەردەوامیدان ب رەوشا پێكڤەژیانێ ل هەرێما كوردستانێ كر، كو وەك نموونەیەكا گەش ل دەڤەرێ دهێتە نیاسین.
