نێچیرڤان بارزانی پێشوازیێ ل سه‌رۆكا هنگاریا دكه‌ت
ئه‌ڤرۆ:
سه‌رۆكێ هه‌رێما كوردستانێ، نێچیرڤان بارزانی، ل فرۆكخانه‌یا نێڤده‌وله‌تی یا هه‌ولێرێ پێشوازی ل (كاتالین نۆڤاك) سه‌رۆكا وه‌لاتێ هنگاریا كر كو ب سه‌ره‌دانه‌كا فه‌رمی بۆ ئیراقێ و هه‌رێما كوردستانێ سه‌ره‌دانا هێزێن وه‌لاتێ خوه د چارچۆڤه‌یێ هه‌ڤپه‌یمانیا نێڤده‌وله‌تی یا دژی داعشێ دا دكه‌ت.
د كۆمبوونه‌كێ دا په‌یوه‌ندیێن هنگاریا ل گه‌ل ئیراقێ و هه‌رێما كوردستانێ، پرۆسه‌یا سیاسی و ڕه‌وشا ئیراقێ ب گشتی، كێشه‌یێن هه‌ولێر- به‌غدا و دانوستاندنێن چاره‌سه‌ركرنا كێشه‌یێن وان، شه‌ڕێ دژی تیرۆرێ و مه‌ترسیێن داعشێ، ڕه‌وشا ئاواره و په‌نابه‌ران و پێكهاته‌یان ل هه‌رێما كوردستانێ هاتنه باسكرن.
هه‌ردو ئالیان دووپاتی ل خواستا دوئالی بۆ پێشڤه‌برنا په‌یوه‌ندیان و هاریكاریا هه‌ڤپشك د هه‌موو بواران دا كر، هه‌روه‌سا به‌رده‌وامیا هاریكاری و پشته‌ڤانیا هه‌ڤپه‌یمانیا نێڤده‌وله‌تی بۆ ئیراقێ و هه‌رێما كوردستانێ ب پێدڤی زانی بۆ به‌رهنگاربوونا تیرۆرێ و ژ ناڤبرنا ئێكجاری یا داعشێ.
نێچیرڤان بارزانی، سه‌ره‌دانا سه‌رۆكا هنگاریا ب نیشانا پشته‌ڤانیێ ل هه‌رێما كوردستانێ هه‌ژمارت و سوپاسیا هه‌رێما كوردستانێ بۆ پشته‌ڤانیا له‌شكری یا هنگاریا بۆ ئیراقێ و هه‌رێما كوردستانێ ل ده‌مێ شه‌ڕێ دژی داعشێ كر، هه‌روه‌سا هاریكاریا مرۆڤایه‌تی ب تایبه‌تی بۆ كریستیان و ئێزدیان ده‌ربری.
ژ ئالیێ خوه‌ڤه، سه‌رۆكا هنگاریا سوپاسیا وه‌لاتێ خوه بۆ قوربانی و ڕۆلێ پێشمه‌رگه‌ی د شكاندنا داعشێ دا ده‌ربری و به‌رده‌وامیا هاریكاریا هه‌ڤپشك و كارێ پێكڤه یێ وه‌لاتێ وێ ل گه‌ل ئیراقێ و هه‌رێما كوردستانێ بۆ نه‌هێلانا تیرۆرێ دووپات كر، هه‌روه‌سا داعش و تیرۆر ب مه‌ترسی بۆ سه‌ر ئازادیێ و دیموكراسیێ هه‌ژمارت و سوپاسیا هه‌رێما كوردستانێ كر بۆ پێكڤه‌ژیان و لێبۆرینێ و پاراستنا ئاواره و په‌نابه‌ران و پێكهاته‌یان ب تایبه‌تی ژی پێكهاته‌یێن مه‌سیحی و ئێزدی.
په‌یوه‌ندیێن ئیراقێ و هه‌رێما كوردستانێ ل گه‌ل وه‌لاتێن ده‌وروبه‌ر و ده‌ڤه‌رێ، گرنگیا پاراستنا سه‌قامگیریا و سه‌روه‌ریا ئیراقێ، شه‌ڕێ ل ئۆكراینا و ده‌ره‌نجامێن وی و چه‌ند پرسێن دی یێن جهێ گرنگیا هه‌ڤپشك، ته‌وه‌ره‌كێ دی یێ كۆمبوونێ بوو.
