نێچیرڤان بارزانی: گیان ژ دەستدانا سەرۆك كۆمار و وەزیرێ دەرڤەیێ ئیرانێ ژ دل خەمباركرین
سەرۆكێ هەرێما كوردستانێ دوهی دوشەمبی 20/5/2024، پەیامەكا بەهیداریێ ئاراستەی حوكمەت و گەلێ كۆمارا ئیسلامییا ئیرانێ كر ژ بەر گیان ژدەستدانا سەرۆك كۆمار و وەزیرێ دەرڤە یێ وی وەلاتی و شاندێ دگەلدا د روودانا كەفتنا هەلیكۆپتەرا وان.
نێچیرڤان بارزانی، سەرۆكێ هەرێما كوردستانێ د پەیاما خوە یا بەهیداریێدا دبێژیت» د ئەڤی دەمێ دژواردا ژ دل هەڤخەم و هەڤسۆزییا خوە ل گەل رێبەرێ كۆمارا ئیسلامی سەید عەلی خامەنەیی و سەركردایەتی و حوكمەت و گەلێ ئیرانا دۆست و هەڤسنور و مالباتێن وان یێن بەرێز دەردبڕین و د پشتڕاستین گەلێ ئیرانێ و كۆمارا ئیسلامی ئەڤێ كارەساتێ ژی دێ دەرباز كەن».
دەقێ پەیاما بەهیداریێ یا سەرۆكێ هەرێما كوردستانێ:
دەنگوباسێ ب ئازار یێ گیان ژ دەستدانا رەحمەتی سەرۆك ئیبراهیم رەئیسی، سەرۆكێ كۆمارا ئیسلامییا ئیرانێ و رەحمەتی حسێن ئەمیر عەبدوللاهیان، وەزیرێ دەرڤە و هەژمارەكا كەسێن د گەلدا د روودانا كەفتنا هیلیكۆپترا واندا، دلتەنگ و خەمباركرین.
د ئەڤی دەمێ دژواردا ژ دل هەڤخەم و هەڤسۆزییا خوە ل گەل رێبەرێ كۆمارا ئیسلامی سەید عەلی خامەنەیی و سەركردایەتی و حوكمەت و گەلێ ئیرانا دۆست و هەڤسنور و مالباتێن وان یێن ب رێز دەردبڕین. ژ خودایێ مەزن دخوازین گیانێ رەحمەتییان ب دلوڤانییا خوە شاد بكەت و ئارامیێ ب هەموویان ببەخشیت.
گیان ژ دەستدانا رەحمەتی سەرۆك رەئیسی خەمەكا ب ئازار و زیانەكا مەزنە بۆ كۆمارا ئیسلامی و گەلێ موسلمان یێ ئیرانێ و دۆستێن وی، بەلێ د پشتڕاستین گەلێ جامێرێ ئیرانێ و كۆمارا ئیسلامی دێ ئەڤێ كارەساتێ ژی دەرباز بكەن. خودایێ مەزن هاریكار و پارێزەرێ هەموویان بیت.
