نەجات شەعبان ئامێدی: 30 % ژ موچەیێ خوە دێ بۆ نەخوەشێن شیرپەنجێ پێشکێش کەم
ئه‌ڤرۆ نيوز:
نەجات شەعبان دیلو ئامێدی بەربژارا ژمارە (38) سەر ب لیستا 183 یا پارتی دیموکراتی کوردستان بۆ رۆژنامەیا ئەڤرۆ دیارکر، کو ئەو وەک کچەکا کورد ھەست ب ئێش و ئازار و نەخوەشیێن خەلکێ خوە دکەت ژ بەر کو ل گەلەک قوناغێت نەخوەشی دەردە سەریێن مللەتێ کورد دا دەرباز بوویە و تەکەز کو دێ 30% ژ موچەیێ خوە پێشکێشی نەخوەشێن توشی شیرپەنجێ و نەخوشیێن گران بووی کەت.
نەجات ئامێدی ، دیار کر ، کو ژبلی خزمەتکرنێ بۆ خەلکێ خوە وێ چ ئارمانجێن دیتر نین د پەرلەمانی دا . و گۆت: ( ھەر دەمێ ئەز بوومە جھێ باوەریا خەلکی و بوومە ئەنداما پەرلەمانی دێ ھەموو شیانێن خوە مەزێخم بۆ سڤک کرن و نەھێلانا ئێش و ئازارێن ھاولاتیان و ھاریکاری کرنا ھەژاران و نەخوشێن دەومدرێژ).
و دیارکر، ژ ئارمانجێن وێ بەرەڤانی کرنە ژ دەستکەفت و ستراتیژیەتا پارتی یێن نەتەوەیی و پرۆژەێ سەرخوەبوونێ و بەرەڤانی کرن ژ سیاسەت و بەرنامە و یاسیێن بێکاریێ و ب رێکا پشتەڤانی کرنا حکومەتێ بۆ کەرتێ تایبەت و ئاڤاکرنا دەزگەھێن ب ھێز و رێکخستنا ھەیکەلێ کەرتێ گشتی و دیتنا ژێدەرێن دی یێن ئابوری دگەل ژێدەرێ نەفتێ.
گۆتژى: ( دیتنا رێیێن چارەسەریێن ب لەز ب رێکا پشتەڤانی کرنا حکومەتێ بۆ کومپانیان و کەسان ب رێکا دانا پارەکێ کاش و وەرنەگرتن یان کێم کرنا باجێ داکو ببیتە ئەگەرێ ب ھێزکرنا سیاسەتا ئابوری دێ ئێک بیت ژ کارێ من و ھەروەسا پشتەڤانی کرنا پیشەسازیا نافخویی و کارێن دەستی بتایبەتی ژی ل دەڤەرێن گەشت و گوزاری ژ بەرنامەیێ منە).
نەجات شەعبان دیلو ئامێدی ژ دایکبوویا سالا 1964 یە ل ئامێدیێ و ھەر ل سالا 1985 ھاتیە رێکخستن دناڤ رێزێن ئیکەتیا قوتابیان ب نھێنی و ژ بەر ئەگەرێن سیاسی مالا وێ ھاتیە دەکرن بۆ ناڤ شورەشێ و ل سالا 1986 بابێ وێ شەھید بوویە و ل سەردەمێ ئەنفالان ل سالا 1988 دەربەردەری تورکیا و ئیرانێ بوویە و ل سەرھەلدانا 1991 ڤەگەریایە کوردستانێ و بەردەوامی دایە خواندنا خوە.
ل سالێن 2006 بۆ 2008 بەرپرسا جڤاتا قەزا ئامێدیێ یا ئێکەتیا ئافرەتێن کوردستانێ بوویە و ل سالا 2006 تا نوکە ئەنداما لقا 18 یا پارتی دیموکراتی کوردستان بوویە .
ناڤھاتیێ باوەرناما بکالوریوس دبوارێ بیرکاریێ دا ل سالا 1996 وەگرتیە و ل سالا 2008 دبلوما بلند یا بوارێ ئامارێ ل زانکویا دھوک وەرگرتیە و ل سالا 2012 ماستەر دبوارێ پلان دانانێ ل زانکویا دھوک وەگرتیە و دیسان چەندین باوەرنامەیێن خولێنن نافخوە و نیڤ دەولەتی وەگرتینە.
ل سالا 1996 تا 2004 رێڤەبەرا ئامادەیا سولاڤ یا کچان بوویە و ل سالا 2004 تا 2017 جێگرا راگرێ پەیمانگەھا تەکنیکی ل ئامێدیێ و سەروکا پشا ئایتی بوویە ل پەیمانگەھا ناڤبری.
2006 تا 2010 ئاڤاکەر و بەرپرسا رێکخراوا زێرین بوویە و ئەنداما سەندیکا ئابوری و سەروکا یانا وەرزشی یا ئامێدیێ بوویە، چەندین پرۆژەیێن گرنگ ب رێڤەبرنە مینا پرۆژێ سەنتەرێ خێزانی و نەھێلانا توندوتیژیا ئافرەتان و پرۆژێن شوونەواری و پرۆژێ چارەسەرکرنا ئاریشێن خێزانی و پرۆژێ قوتابخانەیێن گەروک بۆ ئافرەتان و زارۆیێن گوندان.
ل داوایێ ژی ناڤھاتیێ سوپاسیا ھەر کەسەکی کر یێن وێ ھەژی دبینن دەنگێ خوە دددەنێ.
