نەخۆشخانەکا 200 تەختی دێ ل شنگالێ ھێتە ئاڤاکرن
شێخان، بارزان مزووری:
سەرۆکێ لیژنا ساخلەمیێ ل پەرلەمانێ عیراقێ بۆ رۆژناما ئەڤرۆ دیار کر کو جێگرەکێ کورد بۆ رێڤەبەریا گشتی یا ساخلەمیا مووسل ھاتە دانان و گۆت “بریار ھاتیە دان کو نەخۆشخانەکا مەزن یا 200 تەختی ل شنگالێ بھێتە ئاڤاکرن”.
د. فارس بریفکانی، سەرۆکێ لیژنا ساخلەمیێ ل پەرلەمانێ عیراقێ دیار کر کو پشتی رزگارکرنا قەزا شەنگالێ ئەو وەکو سەرۆکێ لیژنا ساخلەمیێ و ھەموو ئەندامێن لیژنا ساخلەمیا دگەل وەزیرا ساخلەمیا بەغدا دکتۆرە عدیلە حمود کۆمبوون و چەند خالێن گرنگ ھاتنە شرۆڤەکرن و ژ خالێن کو بریار ل سەر ھاتیە دان دەڤەرێن وەکو شەنگالێ بنگەھێن وان یێن ساخلەمیێ دوبارە بھێنە ئاڤاکرن، چونکو ب تمامی ھاتینە کاڤلکرن و گۆت “بریار ھاتە دان نەخۆشخانەکا مەزن یا 200 تەختی د ناڤ سەنتەرێ باژێری دا بھێتە ئاڤاکرن، دگەل دابینکرنا تیمەکا گەرۆک ترۆمبێلێن ھەوار ھاتنێ بەری نەخۆشخانە بھێتە ئاڤاکرن”.
د. فارس بریفکانی ئاشکرا ژی کر کو د تەوەرەکێ دی یێ کۆمبوونێ دا بریار ھاتە دان کو کوردەک پۆستێ جێگرێ رێڤەبەرێ گشتیێ ساخلەمیا مووسل وەرگریت و دێ سەر پەرشتیا ھەموو نەخۆشخانێن دەڤەرێن دەرڤەی ھەرێمێ کەت، کو ھەتا نھا ئیدارا وان د دەستێ ھندەکێن عەرەب دابوو.
