نەسرەت سۆفی: بەغدا ناخوازیت دستوور بھێتە بجهـ ئینان
ئەڤرۆ نیۆز، قائید میرۆ
بڕیارە رەوشا دەڤەرێن کوردستانی یێن دەرڤەی ئیدارەیا حوکمەتا ھەرێما کوردستانێ بھێنە ئاسایی کرن و چاڤدێرەکێ سیاسی ژی ئاماژە بڤێ چەندێ دکەت، بەغدا باش دزانیت بجە ئینانا دستووری د بەرژەوەندیا ھەرێما کوردستانێ دایە.
نەسرەت سۆفی، سەرۆکێ پەیمانگەھا کوردستان بۆ پرسێن سیاسی بۆ ئەڤرۆ نیۆز دیارکر” حوکمەتا بەغدا ناخوازیت دستوورێ عێراقێ بھێتە بجە ئینان وەکی لایەنێن سیاسی لسەر رێکەفتینە، لەوڕاژی سال بۆ سالێ ھاتیە گیروکرن ھەتا گەھشتیە ئەڤرۆ، چونکە دستووری رێک بۆ چارەسەرکرنا ھەموو پرسان داناینە، بتایبەتی مادێ ١٤٠ یێ تایبەت ب دەڤەرێن ئاریشە لسەر.
سەرۆکێ پەیمانگەھا کوردستان بۆ پرسێن سیاسی گۆتژی” حوکمەتا عێراقێ و دەستھەلاتدارێن بەغدا بگشتی ترس لڤێ چەندێ ھەیە ھەردەمێ قۆناغێن مادێ ١٤٠ بھێنە بجە ئینان و کار بگەھیتە سەر راپرسیێ بۆ ئێکلاکرنا چارەنڤیسێ دەڤەرێن ئاریشە لسەر خەلکێ ئەڤان دەڤەران چو گومان تێدا نینە دێ بڕیارا خوە بدەن ڤەگەڕن سەر ھەرێما کوردستانێ نەک بەغدا.
سۆفی دبێژیت” باشترین نموونە ئەنجامدانا پڕۆسا ریفڕاندۆمێ بو ل ئەڤان دەڤەران کو زۆربەیا خەلکێ رەسەنێ دەڤەرێن کوردستانی بڕیارا خوە دابو دگەل ھەرێما کوردستانێ نە، لەوڕا دەستھەلاتدارێن بەغدا ئەڤێ راستیێ باش دزانن بجە ئینانا دستووری د بەرژەوەندیا ھەرێما کوردستانێ دایە.
