نەوەی نوێ و کومەل و ئێکگرتوو دێ بەربژارەک بۆ سەرۆکاتیا ھەرێمێ ھەبیت
ئەڤرۆ نيوز:
رۆژا شەمبی یا بوری رێککەفتی 11 /5/ 2019 پەرلەمانێ ھەرێما کوردستانێ درەگەھێ خوە بەربژارکرنێ بۆ پوستێ سەرۆکاتیا ھەرێما کوردستانێ ڤەکر، داکو ئەو کەسێن بڤێن خوە بەربژار بکەن ددەمێ سێ رۆژاندا سیڤیێن خوە پێشکێشی دەستەیا سەرۆکاتیا پەرلەمانێ کوردستانێ بکەن.
ل گۆڕ راگەھاندنا دەستەیا سەرۆکاتیا پەرلەمانی، مەرجێن بەربژارکرنا پۆستێ سەرۆکێ ھەرێمێ نابیت ژییێ بەربژاری ژ 40 سالان کێمتر بیت، ھەورەسا وەلاتی خوەجە و ئاکنجیێ ھەرێما کوردستانێ بیت، و ژ ھەموو مافێن سڤیل و سیاسی بەھرەمەند بیت.
سەبارەت بابەتێ بەربژارکرنێ، جێگرێ سەرۆکێ فڕاکسیۆنا نەوی نوێ ل پەرلەمانێ کوردستانێ راگەھاند، ئەم بزاڤان ل گەل کومەلا ئیسلامی و ئێکگرتوو دکەین، مە پێکڤە بەربژارەک بۆ پۆستێ سەرۆکاتیا ھەرێما کوردستانێ ھەبیت.
کاوە عەبدولقادر ی ھەروەسا گۆت: ل دۆر ڤی بابەتی مە گەنگە ل گەل فڕاکسیۆنا کۆمەلا ئیسلامی و ئێکگرتوو کرینە و دانوستاندنێن مە دبەردەوامن، ھەموو بزاڤان دێ کەین مە پێکڤە بەربژارەک بۆ پۆستێ سەرۆکاتیا ھەرێما کوردستانێ ھەبیت.
ھەژی گۆتنێ یە پارتی دیموکراتی کوردستان وەک سەرکەفتیا ئێکێ ل ھەلبژارتنێن 30 ئیلونا سالا 2018، بەربژارێ خوە بۆ پۆستێ سەۆرکاتیا ھەرێما کوردستانێ دیار کریە کو ئەو ژی کاک نێچیرڤان بارزانی یە.
ل گۆڕ قانوونا سەرۆکاتیا ھەرێما کوردستانێ یا راستڤەکری، سەرۆکێ ھەرێمێ دێ ل پەرلەمانێ ھەرێما کوردستانێ ب دەنگدانەکا ئاشکرا ھێتە ھەلبژارتن، و ب پڕانیا دەنگێن رەھا یێن ئەندامێن پەرلەمانی ددەمێ سێ رۆژاندا پشتی دەرکرنا بڕیارا تانەلێدانا قانوونا سەرۆکاتیا ھەرێمێ دێ ھەلبژراتن.
ھەکە چو بەرباژارن دەنگێن رەھا یێن دەنگدەران بدەست خوەڤە نەئینان دەنگدان دێ ھێتە دوبارەکرن، و ڕکابەری دێ د ناڤبەرا وان بەربژاراندا بیت یێن پڕانیا دەنگان ب دەستخوەڤە بینن، ئەو بەربژارێ پڕانیا دەنگان بۆ جارا دوێ ب دەستخوڤە ئینان دێ بیتە سەرۆکێ ھەرێما کوردستانێ.
ھەکە ھات و ئێک بەربژار ژی ھەبیت، ھەر دێ دەنگدان ب شێوێ ئاشکرایێ ھێتە کرن، و سەرۆکێ ھەرێمێ دێ دو جێگر ھەبن، بەلێ چ ژوان ھەردو جێگران ل پەرلەمانی باوەری پێناھێتەدان، بەلکی ژ ئالیێ سەرۆکێ ھەرێمێ ڤە دێ ھێنە دامەزراندن و دەستھەلاتێن وانا دێ ھێنە دیارکرن.
