نەینەوا دێ بیتە سێ پارێزگەهـ
ئەڤرۆ نیوز:
سەرۆکێ لیستا برایەتی وپێکڤەژیانێ ل جڤاتا پارێزگەھا نەینەوا بۆ ئەڤرۆ بەحسێ پارچەبوونا پارێزگەھا نەینەوا دکەت و دبێژیت دێ پارێزگەھا نەینەوا بیتە سێ پارێزگەهـ و دێ کورد مفادار بن و ئاریشەیێن ل گەل عەرەبان ژی دێ ب دووماھی ھێن.
سەیدۆ چەتۆ سەرۆکێ لیستا برایەتی و پێکڤە ژیانێ ل جڤاتا پارێزگەھا نەینەوا دیارکرکو دێ ناحیا ئەلقووش و حەمەدانیە و تللسقوف بنە ئێک پارێزگەهـ و دێ ب سەر ھەرێما کوردستانێ ڤە بیت، ئانکو دەشتا نەینەوا دێ بیتە پارێزگەھەکا نوو ب سەر ھەرێما کوردستانێ ڤە و دێ شنگال ژێ بیتە پارێزگەھەک ب سەر ھەرێما کوردستانێ ڤە وداخواز دھاتە کرن تلەعفەر ژی ببیتە پاریزگەە، بەلێ جارێ چو کارێن وەسا بۆ پارێزگەهـ بوونا تلەعفەر نەھاتینە کرن ول دووڤ قانوونێ ودستۆرێ عیراقی، دێ چەندین گۆمەلگەهـ بنە ناحیا و چەندین ناحیە ژی دێ بنە قەزا.
سەیدۆ چەتۆ بەحسێ دەڤەرێن ب سەر قەزا شنگالێ ڤە دکەت د پرسا پارێزگەهـ بوونا شنگالێ ودبێژیت” ل دووڤ قانوونێ دێ ناحیا سنوونێ بیتە قەزا و دێ قەزا سنوونێ ب سەر پارێزگەھا شنگالێ ڤە بیت و گرعزێر دێ بیتە قەزا، تەل بەنات ژی دێ بیتە ناحیە و ل دووڤ قانوونێ وھژمارا ئاکنجیبان وگوھۆڕینا نەخشەی، خانەسوورێ ژی دێ بیتە ناحیە و گوھبەل و بۆرک ژی تێرا ناحیێ بوونێ ھەنە و دەمێ شنگال دبیتە پاریزگەهـ ، دێ سیبا شیخدرا ژی بیتە ناحیە و خەلکێ ڤان دەڤەران ب رێیا رێفراندۆمی ژی دشێن داخوازا وی مافی خوە بکەن و دێ ب سەر ھەرێما کوردستانێ ڤە بن”.
سەرۆکێ لیستا برایەتی وپێکڤە ژیانێ ل جڤاتا پارێزگەھا نەینەوا گۆت ژی” خەلکێ دەشتا نەینەوا داخواز دکەن ببنە پارێزگەهـ و ھەر دەڤەرەکا کوردنشین ببیتە پارێزگەهـ، بێگومان دێ ب سەر ھەرێما کوردستانێ ڤە بیت و خەلکێ وێ دێ چارەنڤیسێ خوە دیارکەن، چونکی ئەڤە چەندین سالە وەلاتیێن دەشتا نەینەوا و شنگالێ دناڤ ئێش و ئازارێن پارێزگەھا نەینەوا دا دژێن ونوکە ھژمارا وەلاتیان گەلەک یا زێدەبووی و نەخشە ژی پێدڤیە دگەل ڤێ زێدەبوونا ھژمارا ئاکنجیان بھێنە گوھاڕتن وئەڤە مەزنترین داخوازیێن خەلکی نە وکار ژی یێ ل سەر دھێتە کرن”.
سەیدو ئاماژە دا وی چەندی کو ئێدی ئێزدیان نەڤێت ب سەر پارێزگەھا نەینەوا ڤە بمینن وئەڤە چەندین جاران داخواز کرن قەزا شنگالێ ببیتە پارێزگەھەکا کوردستانێ وسەرۆک بارزانی و حوکمەتا ھەرێما کوردستانێ یێ کاری ل سەر پارێزگەهبوونا شنگالێ دکەن وکار بۆ پارێزگەھبوونا دەشتا نەینەوا ژی دھێتە کرن.
ناڤبری ئەوژی خۆیا کرکو بەری شەڕی ئازادکرنا مووسلێ دەست پێ بکەت، پێدڤیە حوکمەتا ھەرێما کوردستانی وسەرکرداتیا سیاسی یا کوردی مەرجێن خوە دانن و ب مەرج کورد پشکداریێ د شەڕی ئازادکرنا مووسلێ دا بکەن کو ئێک ژ وان مەرجان ژی ئەو بیت شنگال و دەشتا نەینەوا ببنە دو پاریزگەهـ ب سەر ھەرێما کوردستانێ ڤە، بۆ وێ چەندێ ئێدی خەلک ب ئارامی دبن سیبەرا حوکمەتا ھەرێما کوردستانێ ڤە بژیت”.
