هاریکاری ب سەر زیان ڤێ کەڤتیێن لەهیێ ل زاخۆ دهێنە بەلاڤکرن
ئەڤرۆ نیوز، عەلی حاجی :
بەرپرسێ پشکا ژمێریاری ل قایمقامیا زاخۆ بۆ ئەڤرۆ نیوز دیار کر پشتی قوناغا ئێکێ یا بەلاڤ کرنا هاریکاریێن ماددی ب سەر خودانێن خانیان یێ زیان ڤێ کەڤتین د دەما دروست کرنا لەهیان دا دروست بوین ب دوماهی هاتی نوکە دەست ب قەرەبوکرنا خودانێن دوکان و ترومبێلان هاتە کرن.
زێدەتر رێبەر تەیب گۆت: (ل دووڤ وان سێ ملیارێن حکومەتا هەرێما کوردستانێ و سەروکا هەرێما کوردستانێ بۆ زیان ڤێ کەڤتیێن پارێزگەها دهوکێ رەوانە کرین،بۆ قوناغا ئێکێ ل زاخۆ بۆ خودانێن مالان یێ کو زیان ب وان کەڤتین کو سەرجەمێ وان دبوو ٦٧٣ مال کو زیان ڤێ کەڤتین هاریکاری ب سەر وان دا هاتنە بەلاڤ کرن و سەرجەمێ گشتیێ وان هاریکاریان ژی د بوو حەفت سەد و هەڤدە ملیون و ٥٠٠ هزار دینار و هەر خێزانەکێ ل گورەی تەخمینا بۆ هاتیە کرن ل پارێزگەها دهوکێ ب کوژمەیەکێ پارەی هاتنە قەرەبوو کرن،هەر دیسان ئەڤرۆ ل رۆژا دو شەمبێ ١١/٥/٢٠٢٠ دەست ب قوناغا دوویێ هاتە کرن یا قەرەبوکرنێ و ئەڤ قوناغە ژی تایبەتە ب قەرەبوکرنا دوکان و ترومبێلایە کو ٤٧٥ دوکان و ٩٣ ترومبێلن و سەرجەمی وی پارەی گەهشتیە بەر دەستێ بۆ قەرەبوکرنێ هەشت سەد و چل و حەفت ملیون ٤٥٠ هزار دینارن و ئەڤ هاریکاری یە دەست پێکری یە و د ماوەیێ دو هەتا سێ روژان دا دێ بەردەوام بیت و هندەک جهان ژی هەر ئەڤرۆ ئەو هاریکاری وەرگرتینە).
ناڤهاتی دیار کر ژی ” ب رێیا سێ لژنان کو پێکهاتیە ژ ( گەنجینەیا زاخۆ و قایمقامی و بەرەڤانیا باژێری ل زاخۆ ) و ب رێیا وان لژنان ژی ئەو پارە دهێتە رادەست کرن بۆ زیان پێکەڤتیان و لژنا ب خوە ژی سەرەدانا وان دکەت.
ل دور سەرجەمێ گشتێی وی پارەی بۆ زیان ڤێکەڤتیان ل زاخۆ هاتیە تەرخان کرن رێبەری گۆت: (ژ هەمی باژێران زێدەتر ب هەولێن بەردەوامێن قایمقامێ زاخۆ کوژمێ پارەیی بەر ب باژێرێ زاخۆ کەڤتیە کو سەرجەمی گشتیێ هەردو قوناغان دبیتە ملیارەک و ٥٦٤ ملیون و ٩٥٠ هزاڕ دینارن و دێ شێن بێژین پشکا شێری یا وی پارەی بەر ب زاخۆ کەڤتیە).