هرۆرێ بوویه مه‌یدانا شه‌ڕی د ناڤبهرا پهكهكێ و سۆپایێ توركیا دا
به‌رواری بالا، زنار تۆڤی:
دوهی شه‌ڕ د ناڤبهرا چهكدارێن پهكهكێ و سۆپایێ توركیا دا ل چه‌ندین جهان ل گوندێ هرۆرێ ل ده‌ڤه‌را به‌رواری بالا روودا و وی شه‌ڕی ده‌مژمێر و نیڤان ڤه‌كێشا و تۆپخانێن سۆپایێ توركیا ژی ب دژواری ده‌وروبه‌رێن گوندێ هرۆرێ تۆپباران كرن.
ئازاد ئه‌دیب، موختارێ گوندێ هرۆرێ بۆ رۆژناما ئه‌ڤرۆ دیار كر، ل ده‌مژمێر 11 سپێده‌هیا رۆژا ئێكشه‌مبی 28/11/2021، چهكدارێن پهكهكێ ب چه‌كێن سڤك ته‌قه ل وان ره‌بیێن سۆپایێ توركیا یێن ل هنداڤی گوندێ هرۆرێ كرینه، د هه‌مان ده‌مدا سۆپایێ توركیا ژی به‌رسڤا ته‌قه‌یا وان دایه و گۆت: “بۆ ده‌مێ ده‌مژمێر و نیڤان شه‌ڕ د ناڤبهرا هه‌ردو ئالیان دا روودایه، دیسا ل ئه‌سمانی ژی ده‌نگێ فرۆكان دهاته بهیستن، هه‌روه‌سا تۆپخانێن سۆپایێ توركیا ئه‌وێن ل هنداڤی گوندی ب دژواری هه‌ر چار ره‌خ و دۆرێن گوندی تۆپباران كرن”.
گۆتژی: “هه‌ژماره‌كا گۆلله‌توپان ب دووراتیا 50 مه‌تران ب مالێن گوندیان و نێزیكی قۆتابخانا گوندی ژی كه‌فتینه، وێ تۆپبارانێ ترس و دودلی ل نك خه‌لكێ گوندی په‌یدا كریه، ئه‌ڤه جارا ئێكێ یه سۆپایێ توركیا ب ڤی ره‌نگی گوندێ هرۆرێ تۆپباران دكه‌ت، دیسا ئه‌ڤه جارا ئێكێ یه ژی شه‌ڕ د ناڤبهرا پهكهكێ و سۆپایێ دا توركیا دا ل گوندێ مه دروست دبیت”.
