هشیار زێباری بۆچوونا سیاسی یا پارتی ل دۆر گوهۆڕینان بەرچاڤكر
ل بیرەوەرییا سالڤەگەڕا 79 یا دامەزراندنا پارتی دیموكراتی كوردستان، پشكا دیراسات و پێگەهاندن، ل هۆلا راگەهاندنێ سمینارەك ل دۆر (رێبازا بارزانی) بۆ هشیار زێباری، ئەندامێ دەستەیا كارگێرییا مەكتەبا سیاسی یا پارتی دیموكراتی كوردستان، سازكر.
د ڤێ سمینارێدا كو هەژمارەكا ئەندامێن مەكتەبا سیاسی و كۆمیتەیا ناڤەندی و كادرێن پێشكەفتی یێن پارتی و پەرلەمانتار و بەرپرسێن حزبی و حكومی بەرهەڤ بووین، هشیار زێباری ب چەمكەكێ سەردەمیانە باس ل رێبازا بارزانی كر و بۆچوونا وهزرا بەرفرەه و جیهانبینینا بارزانیێ نەمر شرۆڤەكر.
هشیار زێباری ل دەستپێكی دوپاتكر كو رێبازا بارزانی چ ل دەمێ بۆری، یان بۆ نوكە ونڤشێن داهاتی، بەرنامەیەكێ گشتگیری هەمەلایەنەیە وگیانێ بەردەوامیێ ب خوەڤە دگریت.
د تەوەرەكێ دی یێن سمینارێدا، هشیار زێباری شرۆڤەیەكا لۆژیكی ل دۆر رەوشا نوكە و گوهۆڕینێن نێڤدەولەتی و هەرێمایەتی و رەوشا ناڤخوەیا هەرێما كوردستانێ پێشكێشكر و بۆچوونا سیاسی یا پارتی ل هەمبەر گوهۆڕینان بەرچاڤكر.