هشیار زێباری : بەرپرسێن عێراقی فەشەل د تێگەهشتنا مەترسیا برینا ئاڤێ دا ئینایە
ئەڤرۆ نیوز ، زنار تۆڤی :
پشتی سەرهلدانا كێشەکا مەزن ب ئەگەرێ كێمبوونا قەبارێ وێ ئاڤا ژ توركیا و ئیرانێ بۆ عێراقێ دهێت ، ڤێ چەندێ مەترسیەکا مەزن بۆ سەر ئاڤا ڤەخوارنێ و ئاڤدانێ بۆ چاندنی و ئاژەلداریێ ژی ل عێراقێ دروستکریە ، هشیار زێباری وەزیرێ بەرێ یێ دارایی و دەرڤە یێ عێراقێ رەخنە ل فەرمانرەوایێن عێراقێ دگریت کو نەشیاینە روو ب روو ڤێ تەنگژێ ببن.
ماوێ دوو رۆژانە قەبارێ وێ ئاڤا ژ رووبارێ دیجلە ژ توركیا بۆ عێراقێ دهێت ، كێم بوویە ب ئەگەرێ ب كارخستنا بەنداڤا ئەلیسۆ یا توركی ، د دەمەکێ دا کو ئەو ئاڤا ژ ئیرانێ ژی دهێت یا هاتیە کێم کرن.
زێباری د لاپەرێن خوە یێن تۆرێن جڤاکی دا نڤێسیە ، سەرەرای هشیاریان کو مە چەندین جاران پێشكێش كرینە ، بەلێ فەرمانرەوایێن عێراقێ فەشەل ئینایە د تێگەهشتنا كێشا مەترسیدار یا برینا وێ ئاڤا ژ لایێ توركیا و ئیرانێ ڤە دهێت.
ب ئەگەرێ گرتنا ئاڤا زێی بچووك ژلایێ ئیرانێڤە كێشا كێم ئاڤیێ ل قەلادزێ دروست بوویە و رێڤەبەریا گشتی یا بەنداڤ و كۆگەهێن ئاڤا هەرێمێ روونكرنەک بەلاڤە كریە و دبێژیت ، ب ئەگەرێ گرتنا ئاڤا زێی بچووك ژلایێ ئیرانێ ڤە كێشە بۆ ئاڤا ڤەخوارنێ ل قەلادزێ دروست بوویە.
هەروەسا لدووڤ روونكرنەکا وەزیرێ چاندنێ و ژێدەرێن ئاڤێ ب وەكالەت جێگرێ سەرۆكێ حوکمەتا هەرێمێ ل گەل كونسولخانا ئیرانێ و لایەنێن پەیوەندیار د پەیوەندیەکا بەردەوامدانە بۆ چارەسەركرنا ڤێ كێشێ.
ژلایێ خوەڤە حەسەن جەنابی وەزیرێ ژێدەرێن ئاڤا عێراقێ راگەهاندیە ، کو ل ڤان نێزیکان و د ڤێ هەیڤێ دا دێ سەرەدانا توركیا و ئیرانێ كەین بۆ چارەسەركرنا كێشا كێمبوونا وێ رێژا ئاڤا ژ وان هەر دوو وەلاتان بۆ ناڤا عێراقێ دهێت.
