هنده‌ك وه‌لاتیان خانووێن خوه ب كرێ داینه و چووینه سه‌ر گوندێن خوه
ئه‌ڤرۆ نیوز، نه‌وزاد هلۆری:
پشتی كو قه‌یرانا دارایی درێژبووی و موچه گیروبووی ، پشكه‌ك ژ وه‌لاتیان زڤرینه ناڤا خێزانا مه‌زن و پشكه‌ك ژی چوینه سه‌ر گوندێن خوه و خانویێن خوه ب كرێ داینه هنده‌ك ئاواره و په‌نابه‌ران و خه‌لكێ دن ، شاره‌زایێ ئابووری دده‌تن دیاركرن كو درێژبوونا قه‌یرانا دارایی دێ كارتێكرنێن خراپتر ژی لسه‌ر خه‌لكی هه‌بن.
غازی ئیبراهیم ئێكه ژ وه‌لاتیێن پارێزگه‌ها دهۆك و ژبه‌ر قه‌یرانا دارایی و گیروبوونا موچه‌یان ، ئه‌وی خانویێ خوه دایه ب كرێ و چویه دخانویه‌كێ خوه‌یێ كه‌ڤن دا ل گونده‌كێ سنوورێ ناحیا شێلادزێ و بو ئه‌ڤرۆ نویز گۆت: (ئه‌ز پێشمه‌رگه‌مه و ل ڤی َدوماهیێ كارتێكرن ل موچه‌یێن مه كریه و گیرودبن ، ژبه‌رڤێ بو په‌یداكرنا پاریێ ژیانێ و به‌رده‌وامبوونا ژیانا خوه نه‌چاربووم كو خانویێ خوه‌یێ دهوكێ ب 400 هزار دیناران بده‌م ب كرێ و بچمه دخانویێ خوه‌یێ سه‌رئاخ و كه‌ڤن دا گوندێ خوه ، ب وی پاره‌یێ كو ژ كرێ وه‌ردگرم ژیانا خوه و خێزان و زاروكێن خوه دابین دكه‌م)
زێده‌تر گۆت: (ب هه‌ر رێیه‌كا هه‌بیت پێدڤی یه جاره‌ك دن حكومه‌ت كار بكه‌ت بو خوشكرنا ژیانا وه‌لاتیان ژبه‌ركو نابیت قه‌یران و نه‌خوشی به‌رده‌وامی هه‌بیت و خه‌لك ببیته قوربانی ، و ئه‌م شه‌ڤ و روژ ل سه‌نگه‌رانین و ب شانازیڤه خزمه‌تا پاراستنا كوردستانێ دكه‌ین به‌لێ پێدڤی یه حكومه‌ت و لایه‌نێن سیاسی ژی ناكوكیێن خوه‌یێن سیاسی بده‌ن لایه‌كێ و هزرێ ل ژیانا خه‌لكی بكه‌ن)
رێبین فه‌تاح شاره‌زایێ ئابووری دیاركر كو ژبلی ئه‌وان خه‌لكێ راسته‌قینه‌یێ كوردستانێ ئه‌ڤێن دكریێن خانویان داد ژین و شیان نینن خانویان بكرن و درۆست بكه‌ن ، هه‌ر بتنێ ل هه‌رێما كوردستانێ 581 هزار و 394 ئاواره كو ژ 96 هزار و 899 خێزانێن ناڤا خانویان و هه‌شت هزار و 532 خێزانێن ئاواره و په‌نابه‌ر د ناڤا ئوتێل و موتێلان وه‌كو كرێ دژین و هه‌یڤانه پاره‌یه‌كێ زور دده‌ن و بۆ ئه‌ڤرۆ نیوز گۆت: (هه‌ر تنێ ل پارێزگه‌ها دهۆك 140 هزار و 988 ئاواره و په‌نابه‌ر دخانویێن بكرێ دا دژین ، و سێ هزار و 733 ئاواره و په‌نابه‌ر ژی ل ئوتێل و موتێلان دژین ، ئه‌وێن دن ژی لسه‌ر كه‌مپ و لژێر خیڤه‌تان دژین ، و پشكه‌كا زور ژی ل ئاڤاهیێن نه ته‌مامكری و جهێن ئاینی و مالێن كه‌س و كار دژین ، و رێكخراوێن نیڤده‌وله‌تی بو هه‌ر خێزانه‌كێ شه‌ش كه‌س هژمارتینه)
زێده‌تر گۆت: (ئه‌گه‌ر هه‌ر خێزانه‌ك هه‌یڤانه ب كێمی 200 هزار دیناران كرێ بده‌ت ، ئاواره و په‌نابه‌رێن كو ب كرێ دژین ، ب تنێ ل پارێزگه‌ها دهۆكێ ب كوژمێ چوار ملیار و 824 ملیون دینار ، پاره‌ی بو وه‌لاتیان دزڤرینیت كو ئه‌ڤ یه‌ك ژی ده‌لیڤه‌ك باشه بو خێزانێن پارێزگه‌ها دهۆك د بارودوخه‌كێ نهادا كو قه‌یرانا دارایی كارتێكرن لسه‌ر خه‌لكی كریه ، ئه‌ڤه زێده‌باری وێ یه‌كێ كو رێژه‌یه‌كا زور یا پارێ خه‌لكێ راسته‌قینه‌یێ پارێزگه‌ها دهۆك ژی بو خه‌لكێ دن دچیت)
پشكه‌ك ژ وان گه‌نجێن كو نوو خێزان پێكئینایی خانویێن خوه ب كرێ داینه و چوینه دناڤا خێزانا مه‌زن ( دایباب) و بڤێ یه‌كێ ژی كریا ئه‌وی خانوی بخوه سه‌رفدكه‌ن ، دڤی واریدا رێبینی گۆت: (دماوه‌یێ چوار سالێن بوری دا كێمترین خانوو هاتینه نوژه‌ن و درۆستكرن و ژبه‌ركو ژلایه‌كێ ڤه خودانێن وان خانویان ، خانویێن خوه كرینه كرێ و لسه‌ر كریا وان دژین و ژلایه‌كێ دنڤه نكارن خانویێن خوه درۆست بكه‌ن ، پشكه‌ك ژ وان خێزانێن وه‌كو ئاواره و په‌نابه‌ر ل هه‌رێما كوردستانێ دژین ب تایبه‌تی ل سنوورێ پارێزگه‌ها دهۆك زڤرینه‌ڤه سه‌ر مال و حالێن خوه و بڤێ یه‌كێ ئه‌و خانوو ب چولی ماینه و ئه‌ڤ یه‌ك ژی بویه ئه‌گه‌ر كو بهایێ كریا خانویان بهێته‌خوار و كێمتر بیت و كارتێكرنێ ل ژیانا خه‌لكێ راسته‌قینه‌یێ پارێزگه‌هێ بكه‌ت ژبه‌ركو ئه‌و خێزانێن كو خانویێن خوه ب كری َدابوون ئێدی مانه بێ كرێ و داهاتی)
