ههتا نوكه زیاندارێن تیرۆرستێن داعشێ نههاتینه قهرهبووكرن
دهۆك، لهزگین جوقی:
رێڤهبهرێ ناوچهداریا باشیكێ دیار كر كو 95% ژ خهلكێ باشیكێ یێن زڤڕینه سهر مالێن خوه و دبێژیت: ژ سالا 2014ێ وهره ههتا نوكه بهغدا ئێك خێزانا زیاندار ژی قهرهبوو نهكریه و ههر خێزانهكا ل باشیكێ بیت تووشی زیانێ بوویه.
زهنون یونس، رێڤهبهرێ ناوچهداریا باشیكێ بۆ رۆژناما ئهڤرۆ راگههاند: “حوكمهتا ئیراقێ د وارێ خزمهتگوزاری دا وهكو پێدڤی خزمهتا دهڤهرا باشیك و بهحزانێ نهكریه، لهو وهلاتی دخوازن پتر گرنگی ب دهڤهرا باشیك و بهحزانێ بهێتهدان، دیسا ئهو مهزارگههێن ئولی یێن ژلایێ تیرۆرستێن داعشێڤه هاتینه پهقاندن، خهلكێ دهڤهری ل سهر ئهركێ خوه ئاڤاكرینه”.
ناڤهاتی گۆتژی: “نێزیكی 150 هزار كهسان ژ خهلكێ باشیك و بهحزانێ ل سهر دهستێن تیرۆرستێن داعشێ زیاندار بووینه و هێشتا نههاتیه قهرهبوون، دیسا پتریا خهلكێ زڤڕینه سهر جهێن خوه ژی دهست ب ژیانا خوه یا نورمال كرینه، لهو ئهم هیڤیدارین د ههموو بیاڤان دا پتر گرنگی ب باشیك و بهحزانێ بهێتهدان”.
رێڤهبهرێ ناوچهداریا باشیكێ ئاشكرا ژی كر كو خهلكێ باشیك و بهحزانێ گهلهكێ مهغدوره و نوكه ب رێژا 95% خهلك یێ زڤڕیه سهر مالێن خوه، لێ مخابن ههتا نوكه حوكمهتا ئیراقێ ئێك خێزان ژی قهرهبوو نهكریه، ههموو خێزانێن باشیك و بهحزانێ ل سهر دهستێن تیرۆرستێن داعشێ زیاندار بووینه و ههتا نوكه چو تشتهك بۆ خهلكی نههاتیه كرن.
زهنون یونس خویا ژی كر كو لژنا قهرهبووكرنێ ل مووسلێ یه و گهلهك خهلك ل سهردهمێ تیرۆرستێن داعشێ زیاندار بووینه، هندهك خێزان ههنه ترۆمبێلێن وان نهماینه، هندهكان ژی خانیێن وان هاتینه خرابكرن و هندهك خێزانان ژی كهلوپهلێن وان ههموو یێن هاتینه تالانكرن و هندهكان ژی داروبار و بیستانێن وان هاتینه سۆتن و تێكدان و ههتا نوكه نههاتینه قهرهبووكرن.