هه‌تا نوكه 370 زه‌ڤێن مینرێّژكری ل دهۆكێ هاتینه پاقژكرن
دهۆك، له‌زگین جوقی
به‌رپرسێ راگه‌هاندنا رێڤه‌به‌ریا گشتیا كارۆبارێن مینان ل پارێزگه‌ها دهۆكێ دیار كر: ل پارێزگه‌ها دهۆكێ 775 زه‌ڤیێن مینرێژكری هه‌نه، هه‌تا نوكه 370 زه‌ڤی هاتینه پاقژكرن. ل سالا 2008 هه‌تا 2022ێ 113 كه‌س بووینه قوربانیێن مین و ته‌قه‌مه‌نیان ل دهۆكێ، 39 كه‌سان گیانی خۆ ژ ده‌ستدایه و 74 كه‌س ژی برینداربووینه”.
رێگر بێسفكی، به‌رپرسێ راگه‌هاندنا رێڤه‌به‌ریا گشتی یا كارۆبارێن مینان ل پارێزگه‌ها دهۆكێ راگه‌هاند : ژ سه‌رجه‌مێ 775 زه‌ڤیێن مینرێژكری هه‌تا نوكه 370 زه‌ڤی هاتینه پاقژكرن و هێشتا 405 زه‌ڤیێن مینرێژكری ماینه، رووبه‌رێ وان دبیته 32 ملیۆن دونه‌مێن ئه‌ردی، هه‌تا نوكه 39% ژ ئه‌ردێ مینرێژكری یێ هاتیه پاقژكرن، ئه‌ڤ زه‌ڤیێن مینرێژكری به‌ره‌ڤ زێده‌بوونێ نه، چونكو هێشتا گه‌له‌ك جه هه‌نه نه‌هاتینه تۆماركرن ئه‌و بخۆ مینرێژكرینه پتریا وان ل ئامیدیێ و ده‌ڤه‌را به‌رواریا هه‌نه.
ئاشكرا كر:” ب تنێ ل قه‌زا ئامێدیێ 298 زه‌ڤیێن مینرێژكری هه‌نه، ئه‌و ژی ل سه‌رسنكێ 42 زه‌ڤیێن مینرێژكری، ژ وانا ژی 24 زه‌ڤی یێن هاتینه پاقژكرن و ل كانی ماسێ ژی 122 زه‌ڤیێن مینرێژكری هه‌نه، ژ وانا ژی 8 زه‌ڤی هاتینه پاقژكرن و ل چه‌مانكێ ژی 52 زه‌ڤیێن مینرێژكری هه‌نه 17 زه‌ڤی یێن هاتینه پاقژكرن، ل بامه‌رنێ 19 زه‌ڤیێن مینرێژكری هه‌نه، 9 زه‌ڤی یێن هاتینه پاقژكرن و ل ئامیدیی ژی 26 زه‌ڤیێن مینرێژكری هه‌نه، ب تنێ 6 زه‌ڤی یێن هاتینه پاقژكرن و ل دێره‌لوكێ ژی 37 زه‌ڤیێن مینرێژكری هه‌نه ژ وانا ژی 14 زه‌ڤی یێن هاتینه پاقژكرن.
