هه‌رێما كوردستانێ تۆمه‌تێن رۆسيا ره‌ت دكه‌ت
ئه‌ڤرۆ نيوز:
شيره‌تكارێ رۆژنامه‌ڤانى يێ نڤيسينگه‌ها سه‌رۆكێ هه‌رێما كوردستانێ، كيفاح شنگالى، ئه‌ڤرۆ رۆژا شه‌مبى د داخۆيانيه‌كێ دا ره‌تكر كو هه‌رێما كوردستانێ په‌ترۆلا داعش بكريت، دده‌ته زانين ژى كو ئه‌ڤ داخۆيانيه “زۆلمه و تێكدانا راستيانه”، نه‌ڤه‌شارت ژى كو پشتى بڕينا به‌هرا هه‌رێما كوردستانێ ژ بودجا عيراقێ ب ره‌نگه‌كێ به‌رده‌وام ترێلێن ڤه‌گوهاستنا په‌ترۆلێ د ناڤبه‌را هه‌رێم و توركيا دا هاتنوچوونێ دكه‌ن.
كيفاح شنگالى بۆ سومه‌ريه نيوز گۆت: “ب هزارا ترێل خالا سنورى يا ئيراهيم خه‌ليل بكار دئينن بۆ ڤه‌گوهاستنا كه‌رستان ژ بۆ هه‌رێما كوردستانێ و هنده‌ك ژى په‌ترۆلا هه‌رێما كوردستانێ بۆ به‌ندرێن توركى ڤه‌دگوهێزيت بۆ پارزنينكرنێ و دووباره ڤه‌گه‌راندنا وێ يان ژى فرۆتنا وێ”.
زێده‌تر گۆت: “ئه‌ڤ كرياره ژى يا ده‌سپێكرى پشتى حوكمه‌تا عيراقێ به‌هرا هه‌رێما كوردستانێ ژ بودجێ بۆ ماوێ دو سالايه راوه‌ستاندنى، مووچێن فه‌رمانبه‌ران ژى نه‌مه‌زاختى”.
شنگالى ئاماژه ب وێ چه‌ندێ ژى كر كو رۆسيا باش دزانن هه‌رێما كوردستانێ و گه‌لێ وێ و هێزێن وێ شه‌رێ چه‌كدارێن داعشا تيرۆرست دكه‌ن ب درێژاهيا زێده‌ترى هزار كيلۆمه‌تران و هه‌تا نوكه 95% ژ ئه‌ردێ بنده‌ستكريێ خوه ژ چه‌كدارێن داعش ڤه‌گه‌رانديه و گۆت: “چاوان دێ هه‌رێما كوردستانێ بۆ كاره‌كێ ژ ڤى ره‌نگى هێته بكارئينان”.
شيره‌تكارێ راگه‌هاندنێ يێ سه‌رۆكێ هه‌رێما كوردستانێ نه‌ڤه‌شارت ژى كو نه دادى يه ژ به‌ر هه‌بوونا ئاريشێن سياسى يێن د ناڤبه‌را توركيا و رۆسيا دا، كوردستان و گه‌لێ وێ ب ڤان ره‌نگه تۆمه‌تا بهێنه تۆمه‌تباركرن و گۆتژى: “راوه‌ستاندنا فرۆكا ژى ل فرۆكخانێن مه‌ده‌نى و گه‌ف كرنه سه‌ر ئێمناهى و سلامه‌تيا ئابوور و خه‌لكێ وێ ب بورينا مووشه‌كێن وێ ئه‌وێن دبێژن ئه‌و بۆ بۆردۆمانا باره‌گايێن چه‌كدارێن داعش و ئۆپۆزسيۆنا سورى دهێنه ب كارئينان”، خۆيا كرژى كو تۆمه‌تێن رۆسيا بۆ سه‌ر هه‌رێمێ “زۆلمن و تێكدانا راستيايه”.
ده‌سته‌يا ئه‌ركانێن گشتيا رۆسى وێنێن ئه‌سمانى يێن ده‌ڤه‌رێن ده‌وروبه‌رێن زاخۆ به‌لاڤكرينه كو تێدا نێزيكى 12 هزار ترۆمبێلێن ڤه‌گوهاستنا په‌ترۆلێ ل سه‌ر هێلا سنورى يا ناڤبه‌را عيراق و توركيا وێنه‌كرن و ئاماژه ب وێ چه‌ندێ كريه كو ئه‌ڤه په‌ترۆلا داعشه د ڤێ ده‌ڤه‌رێ را بۆ توركيا دهێته ره‌وانه كرن.
