هه‌ر تشت ده‌رباره‌يى گرتنا رۆژناما وار و كه‌نالێ وار سپۆرت
ئه‌ڤرۆ نيوز:
رۆژناما وار ب ھەلکرنا شەمالکا شەشێ ژ ژیێ خوە شاد نەبوو، ل دووڤ بریارەکا کۆمپانیا پالو کەنالێ ئاسمانیێ وار یێ وەرزشی ل گەل رۆژناما وار کو رۆژنامەکا رۆژانە بوو، ئێڤارا ١٥ ڤێ ھەیڤێ راوەستیان. د. فازل عومەر سەرنڤیسەرێ رۆژناما وار د گەنگەشەکا سەر پێ دا دیار کر، کاودانێن دارایی ئەگەر بووینە دەزگەھێ پالۆ ھندەک چەقێن خوە کێم بکەت و ناچاربوو رۆژناما وار و کەنالێ وارێ سپورتێ ئەسمانی بگریت ، بێی زێدەتر بەحس بکەت.
تەحسین ناڤشکی، جێگرێ سەرنڤیسەرێ رۆژناما وار د دیدارەکا رۆژناما ئەڤرۆ دا دیار کر، رێکەفتی ١-١٠-٢٠٠٩ ئێکەم ھژمار ژ رۆژناما وار دەرکەفت و ھەر ئێکسەر رۆژانە و ئەڤە دبیتە شەش سال و پازدە رۆژ یا بەردەوام، دووماھی ھەژمار ١٤٢٧ رۆژا سێشەمبی ب دووماھی ھات و گۆت: ل گەل دەرکەفتنا رۆژانێ گەلەک جاران پاشکۆ ژی ل گەل دەردکەفتن وەک پاشکۆیەکا زارۆیان، دیرۆک گۆڤار بوو، زینێ گۆڤارەک بوو، دیسان پاشکۆیێ سپۆرت ژی ھەبوو، ل بیرەوەریان پاشکۆ دەردکەفتن و ھەر ئێکی ستافەک ھەبوو.
ناڤبری زێدەر ژی گۆت: رۆژناما وار گشتی، سیاسی، رەوشەنبیری، دووڤچوون، ئەدەب و ھونەر، زانست، ساخلەمی، رەنگا و رەنگ بوو، وەک مارکێتەکێ بوو و ھەر تشتەکێ تە دڤیا ھەبوو، ل دەسپێکێ ١٢ پەربوون و پاشان بوونە ١٦.
ناڤشکی گرتنا رۆژناما وار ب نەخۆشی ل قەلەم دا و د ھەمان دەم گۆت: سرۆشتیە و ل دونیایێ ھەموو ھوسانە و رۆژنامە دەمەکی دەردکەڤن و گەلەک جاران د راوستن و ڤێ راوستیانێ ھوکار ھەنە و دیسان یان پشتەڤانی نینە یان نەبوونا خواندنەڤانی بیت و نەشێت پەیامێ بگەھینتێ و گەلەک ھوکار ھەنە، ب تنێ ھوکارێن راوستیانا رۆژناما (وار) ھوکارێن ئابووری نە و ئەڤ رەوشا نوکە ل سەر ھەرێما کوردستانێ دا ھاتی و دبیت ئەڤە دەمکی بیت و ئەگەر رەوش وەک جاران بزڤریت، دبیت رۆژناما وار بزڤریتە ڤە، لێ نوکە بریار ھاتیە دان ببیتە حەفتینامە و حەفتیێ جارەکێ دەرکەڤیت و بێ دیارکرنا ستافێ نوو یێ حەفتیناما وار.
تەحسین ناڤشکی ل ھەمبەر بریارا گرتنێ گۆت: بریارا گرتنێ نەیا ژ نشکەکێ ڤە بوو، ئەڤە کاودانێن دارایی ل سالا بۆری تێک چووین، گەلەک کەسان بەرگێریا ژ رۆژنامێ گرتی کو نەھێتە گرتن و بمینیت، مۆچێن کادرێن رۆژنامێ وەک حوکمەتێ ئەڤە سێ ھەیڤە نەھاتیە مەزاختن، ب تنێ پاداشتێن رۆژنامێ ئەڤە ١٣ ھەیڤە نەھاتیە مەزاختن، ئانکو ژ ھەیڤا نەە یا سالا ٢٠١٤ وەرە و گۆمان نینە نڤیسەر ژی وەک بەرێ نە مابوون، چونکو مافێ نڤیسەری یە پاداشتا خوە وەربگریت، چونکە گەلەکان منەت ب ناڤی نینە و ناڤێ وی ھەیە و پاداشتا خوە دڤێت و پشت گەرما وی ب پێنوسێ وی یە و ئەگەر سالەکێ پاداشت نە وەرگرت دبیت جارا ل دووڤ دا بۆ رۆژنامێ نە نڤیسیت.
زێدەتر ژی گۆت: ستافێ رۆژنامێ ل گەل دیزاینەران ھەتا ٤٠ کەسان بووینە، زێدەباری پەیامنێرێن دەرڤە کو پێشتر کەلەک بووینە و پشتی ڤەبوونا کەنالێ وار مە پشتبەستن ل سەر کەنالی کر و پەیامنێرێن مە کێم بوون، پەیامنێرێن دەرڤە ھەتا پێنچ پەیامنێران وار ھەبوون و رۆژانە دەنگ و باسێن دەڤەرێن خوە ڤەدگوھاستنە رۆژنامێ، رۆژنامەڤانێن کاردکرن ل رۆژنامێ ئەڤ دەمێ خوە ژ خێزانین خوە دبر بۆ چەند دەژمێران کار دکر ب مەرەما دابینکرنا پاریێ ژیانێ بۆ خێزانا خوە و ئەگەر ئەف کادرە نەھێتە رۆژنامێ دێ کارتێکرن لێ ھێتەکرن.
ناڤشکی ھەمبەر گرتنا رۆژنامێ و بوشاھیێ ل دەڤەرێ گۆت: گومان نینە و ھەر تشتەکێ دەرکەڤیت رۆژانە و شەش سالان بەردەوام بیت و ل گەل رۆژناما ئەڤرۆ و ھەبوونا ھەر دوکان پێکڤە و دشێین بێژین باشیەک دا رەوشەنبیریا دەڤەرێ، چونکە پتر ھەڤرکی پەیدا بوو د ناڤبەرا رۆژنامەڤانێن دەڤەرێ دا و ھەر دوکان ل جھێ خوە خزمەتەک دکر و ھەڤرکیەکا شەریف ھەبوو و پتر د مفایێ رۆژنامەڤانی دا بوو، ئەگەر رۆژنامەڤانەکی رۆلێ خوە سۆبە ل ئەڤرۆ نە دیتبا دبیت ل رۆژناما وار دیتبا و بەرۆڤاژی ژی ھەکە وار نەدیتبا دبیت ل رۆژناما ئەڤرۆ دیتبا، لێ نوکە دەمێ د بەرژوەندیا رۆژنامەڤانی دا نینە و دەمێ بوویە ئێک رۆژنامە و دبیت وەک خوە مەرجێن خوە ل سەر رۆژنامەڤانی ب سەرپینت، رۆژنامەڤانی ژی چو رێ نینن و نەچارە پێگیربیت.
ھەمبەر داھاتێ ریکلامێن رۆژنامێ ژی ، تەحسین گۆت: دشیاین ب داھاتێ ریکلاما خوە ب رێڤەببەین، لێ دەمێ دەزگەھێ پالو ھەموو بوویە ئێک و داھاتێ رۆژنامێ دچوو ژمێریاریا گشتیا دەزگەھی دا و ھەر داھاتەکێ ھاتبا ژ ریکلامێ دچوو ئیدارا گشتی و وان ژی ل دووڤ رێژا رۆژنامێ سەردەری ل گەل مە دکر و ئەو ژی تێرا پێدڤیێن رۆژنامێ ب خوە نەبوون، ئەڤجا چەوا دا شێن پاداشتێن رۆژنامێ دەین، ئەگەر داھاتێ وێ ب خوە بوو وێ رێک ھەبوون وەک ببا ھەشت بەرپەر و ستاف ھاتبا کێمکرن.
جێگرێ سەرنڤیسەری نەڤەشارت و گۆت: مەزاختیێ رۆژنامێ ھند گەلەک نەبوو ئەگەر بەراورد بھێتەکرن ل گەل دەزگەھەکی کو تەلەڤزیۆن تێدا ھەبیت، بۆ دەزگایی ژی نەخوەشە پشتی شەش سالان ڤێ بریارێ بدەت و ئەو ژی دبێژن بەروەختە و ھەر دەمێ کاودان چێبوون دێ رۆژنامە وەک بەرێ زڤریت.
تەحسین ناڤشکی خویاژی کر، ئەز پشکداری کۆمبوونا دەزگەھی نەبوویمە و ب تنێ وەک ھەر کادرەکی ھاتینە ئاگەھدارکرن کو رۆژنامە ھاتە راوستاندن و من پێزانین نینن دێ چو ل ستافێ رۆژنامێ و تەلەڤزیۆنا وار سپورت ھێتەکرن.
گۆت ژی: ستافێ رۆژنامێ ب ئێک گیان پێکڤە کار کرینە و پێخۆش بووینە و بەردەوام ئاستێ رۆژنامەیێ بۆ بلندیێ دچوو، رۆژنا مە شیا ب دەھان خامێن نوو و پەیامنێرێن باش پێشکێشی دھۆکێ بکەت، گرتنا رۆژنامەیا وار دربەکێ مەزن بوو ل بیاڤێ راگەھاندن و رەوشەنبیریێ ل دھۆکێ کەڤتی، پرسیار ئەوە بۆچی دێ ئەڤ کریزا دارایی ب تنێ کاریگەریێن خوە یێن نەرێنی ل سەر راگەھاندنا دھۆکێ ھەبیت؟ بۆچی (رووداو، nrt، زاگرۆس، کوردستان، k٢٤ کو دێ نھا ڤەبیت) نەھاتنە گرتن؟
رۆژنامەڤان بورھان یەحیا ژ رۆژناما وار گۆت: وەک ئێک ژ ستافێن رۆژنامێ (سەرپەرشتێ بەرپەرێ ئازاد) خودان خێزانم و دو زارۆ من ھەنە و کرێدارم و گرتنا رۆژنامێ دێ زیانەکا مەزن ل ژیارا من ژ لایێ دراڤی ڤە گەھینیت، ھەر چەندە فەرمانبەرێ حوکمەتێ مە، لێ مۆچێ من تێرا کرێیا خانی ب تنێ ناکەت، نزانم ل ڤێ قەیرانا دارایی دێ ل کیڤە شێم کارەکی بۆ خوە پەیدا بکەم و ئایا ئەو حەز و شیانێن من یێن پیشەیا رۆژنامەڤانیێ کو ١٢ سالن کار تێدا دکەم چو لێ ھێت؟