هه‌ر جهه‌كێ گه‌شتیاری زمانێ كوردی نه‌كه‌ته یێ سه‌ره‌كی مۆهله‌تا وی دێ هێته هه‌لوه‌شاندن
ئه‌ڤرۆ:
ده‌سته‌یا گشتی یا گه‌شتوگوزارێ ل هه‌رێما كوردستانێ جهێن گه‌شتیاری نه‌چار دكه‌ت، كو پێگیریێ ب زمانێ كوردی بكه‌ن و دیار كریه، هه‌ر جهه‌كێ پێگیریێ ب زمانێ كوردی نه‌كه‌ت، مۆهله‌تا وی دێ هێته هه‌لوه‌شاندن.
ل دووڤ فه‌رمانه‌كا كارگێڕی یا ده‌سته‌یا گشتی یا گه‌شتوگوزارێ ل هه‌رێمێ، كو ئیمزا ئه‌مه‌ل جه‌لال، سه‌رۆكا ده‌سته‌یێ ل سه‌ره، هه‌موو هۆتێل و مۆتێل و كافێ و خوارنگه‌ه و ئه‌و جهێن گه‌شتیاری یێن خزمه‌تگوزاریێن گه‌شتیاری تێدا دهێنه پێشكێشكرن، پێگیر دكه‌ت، كو زمانێ كوردی بكه‌نه زمانه‌كێ سه‌ره‌كی و یێ ئێكێ بۆ لیستا پێشكێشكرنا خوارنان و تابلۆیێن ناڤێن بازرگانی یێن جهێن خوه، پاشی دشێن هه‌ر زمانه‌كێ دی یێ بیانی ژی بكاربینن، بۆ جهئینانا ڤێ بڕیارێ ژی ب تنێ 15 رۆژ هاتینه دیاركرن.
دیسا د وێ فه‌رمانێ دا هه‌موو رێڤه‌به‌ریێن گشتی و لژنێن تایبه‌ت و هاتینه راسپاردن بۆ بجهئینانا ڤێ بڕیارێ، دیسا سزایێ سه‌رپێچیكاران ژی دێ هێته تۆماركرن، كو ژ دائێخستنا جهێ وان بۆ ده‌مێ سێ رۆژان ده‌ستپێ دكه‌ت، هه‌كه دووباره ژی ببیت بۆ ده‌مێ حه‌فت رۆژان دێ هێته دائێخستن یان ژی مۆهله‌تا كاركرنا وی جهێ گه‌شتیاری دێ هێته هه‌لوه‌شاندن.
