هه‌ر 48 ده‌مژمێران كه‌سه‌ك ب روودانێن هاتنوچوونێ گيانێ خوه ژ ده‌ست دده‌ت
ئه‌ڤرۆ نيوز:
رێڤه‌به‌ريا هاتنوچوونا پارێزگه‌ها دهۆكێ ئامارا حه‌فت هه‌يڤێن ئێكێ يێن سالا 2015ێ ل سنورێ رێڤه‌به‌ريا هاتنوچوونا وان به‌لاڤكر كو تێدا 705 روودان په‌يدا بووينه.
رائيدێ مافپه‌روه‌ر ئازاد تاها، به‌رپرسێ پشكا راگه‌هاندنێ ل رێڤه‌به‌ريا هاتنوچوونا پارێزگه‌ها دهۆكێ د داخۆيانيه‌كێ دا بۆ ئه‌ڤرۆ نيوز ئامارا حه‌فت هه‌يڤێن بۆرى يێن سالا 2015 يێن روودانێن هاتنوچوونێ ئاشكه‌را كر كو تێدا 705 روودان په‌يدا بووينه و زێده‌ترى 100 كه‌سان گيانێ خوه ژ ده‌ست داينه.
رائيدێ مافپه‌روه‌ر زێده‌تر گۆت: “د حه‌فت هه‌يڤێن ده‌سپێكێ يێن سالا 2015ێ دا، 542 لێكدان و 110 وه‌رگه‌ريان و 53 لێدان په‌يدا بووينه كو سه‌رجه‌مێ وان دبيته 705 روودان”.
دا زانين ژى كو ژ سه‌رجه‌مێ ڤان روودانان 1635 زه‌لام و 612 ژن بريندار بووينه كو زێده‌ترى ڤان برينداران ژى يێن هه‌يڤا هه‌يڤا نيسانێ بووينه كو 371 قوربانى بووينه.
به‌رپرسێ پشكا راگه‌هاندنێ ل رێڤه‌به‌ريا هاتنوچوونا پارێزگه‌ها دهۆكێ ده‌رباره‌يى رێژا وان كه‌سێن گيانێ خوه ژ ده‌ست ژى دايى گۆت: “د وان حه‌فت هه‌يڤان دا، 105 كه‌سان گيانێ خوه ژ ده‌ست دايه و ژ وان ژى 24 ژن و 81 زه‌لام بووينه و زێده‌تر ژى د هه‌يڤا گۆلان و تيرمه‌هێ دابووينه كو هه‌ر هه‌يڤێ 20 روودان بووينه”.
رائيدێ مافپه‌روه‌ر ئازاد تاها نه‌ڤه‌شارت ژى كو زێده‌تريا ڤان روودان ژ ئه‌گه‌رێ له‌ز و نه‌پێگريكرنێ بووينه ب رێنمايێن هاتنوچوونێ و هيڤى ژ وه‌لاتيان خواست بۆ ساخى و سلامه‌تيا خوه و يێن ل گه‌ل و به‌رامبه‌ر خوه، پێگريێ ب رێنمايێن هاتنوچوونێ بكه‌ن.
