هه‌كه نه‌فت بگه‌هته ڤى ئاستى دێ كێشا عيراق و هه‌رێمێ يا دارايى چاره بيت
ئه‌ڤرۆ نيوز: ره‌وان نهێلى:
ل دووڤ نوچه‌يه‌كێ CNN ئه‌گه‌ر بهايێ ئێك به‌رميلا نه‌فتێ د بازارێن جيهانێ دا بگه‌هته 80 دولاران، دێ كێشا دارايى يا هه‌رێم و عيراقێ چاره بيت ژبه‌ر كو ب ره‌نگه‌كێ سه‌ره‌كى عێراق پشت به‌ستنێ ب نه‌فتێ دكه‌ت.
خالد فالح سه‌رۆكێ جڤاتا برێڤه‌برنا كومپانيا ئه‌رامكو يا سعودى كو ئێك ژ مه‌زنترين كومپانيا بوارێ نه‌فتێ يه ل جيهانێ دبێژيت: ئه‌م نه نه‌چارين كو ئاستێ هنارتنا نه‌فتا خوه كێم بكه‌ين، دا ده‌ليڤه بۆ هنده‌ك وه‌لاتێن دى دروست ببيت كو په‌ترولێ زێده‌تر بهێنێرن.
خالد فالح سه‌رۆكێ جڤاتا برێڤه‌برنا كومپانيا ئه‌رامكو يا سعودى ئاماژه ب وێ يه‌كێ كر كو ئه‌و ب تنێ نه‌شێن ئاستێ هنارتنا نه‌فتێ كێم بكه‌ن هه‌تا كو بهايێ نه‌فتێ گران ببيت و گوت: ئه‌م دێ ل گه‌ل وه‌لاتێن به‌رهه‌مئينانا نه‌فتێ د به‌رهه‌ڤ بين كو پشكداربين د كێم هنارتنا نه‌فتێ، و ئه‌گه‌ر ولاتێن خه‌ليجى پێكڤه ئه‌ڤ كاره كر، وى ده‌مى دێ ئاستێ بهايێ نه‌فتێ د بازارێن جيهانێ دا بلند بيت.
به‌رى نوكه ولاتێ ئوردن پێشنيازا وێ يه‌كێ كربوو كو ولاتێن خه‌ليجى هه‌موو پێكڤه 10% ئاستێ فروتنا نه‌فتا خوه بۆ بازارێن جيهانێ كێم كه‌ن كو دێ بيته سه‌ده‌م بهايێ نه‌فتێ بگه‌هته 80 دولاران و زێده‌تر.
ئه‌ڤ داخويانيێن سعوديێ دده‌مه‌كێ دا يه كو بهايێ نه‌فتێ بۆ هه‌ياما زێده‌تر هه‌يڤه‌كێ يه هاتيه دبن 35 دولاران دا و هه‌تا 27 دولاران ژى گه‌هشتيه و ولاتێ سعوديێ بۆ رزگاربوون ژ قه‌يرانا دارايى دڤێت بهايێ ئێك به‌رميلا نه‌فتێ بگه‌هته 106 دولاران و چاڤدێر ژى وه‌سا دبينن ئه‌گه‌ر ولاتێن به‌رهه‌مئينانا نه‌فتێ، ئاستێ فروتنێ كێم نه‌كه‌ن، ب زه‌حمه‌ت بهايێ به‌رميلا نه‌فتێ زێده ببيت.
ژێده‌ر: CNN
