هه‌كه پرۆسا خواندنێ هاته راگرتن، دێ دهۆك ژى ڤه‌گريت؟
ئه‌ڤرۆ نيوز:
وه‌زيرێ په‌روه‌ردێ ل هه‌رێما كوردستانێ دياركر كو پرۆسا خواندنێ ل هه‌رێما كوردستانێ ناهێته راگرتن ب تنێ ل وان جهان نه‌بيت يێن ده‌رگه‌هێن قوتابخانان هاتينه داخستن.
پشتيوان سادق، وه‌زيرێ په‌روه‌ردا حوكمه‌تا هه‌رێما كوردستانێ د كۆنفرانسه‌كێ رۆژنامه‌ڤانى دا گۆت: “ل هه‌موو جيهانێ وه‌سايه، نابيت ئه‌و مامۆستايێن ده‌وامێ دكه‌ن و يێن ده‌وامێ نه‌كه‌ن وه‌كو ئێك بهێنه ته‌ماشه‌كرن، هنده‌ك ژ ئه‌وێن ده‌وام نه‌كرين، كاودانه‌كێ تايبه‌ت هه‌بوو كو په‌يوه‌ندى ب ره‌وشا دارايى ڤه هه‌يه و ئه‌و ژى چو پێ نه‌ڤێت، جهێ رێزێ نه، به‌لێ هنده‌ك كه‌س يێن هه‌ين ژ ده‌رڤه‌ى په‌روه‌ردێ نه و رێ ناده‌ن ده‌رگه‌هێن قوتابخانان ل هنده‌ك جهان بهێنه ڤه‌كرن”.
پشتيوان سادق گۆتژى: “ئه‌و ته‌حه‌مولا به‌رپرساتيا مێژووى دكه‌ن به‌رامبه‌ر خودێ، قانوون و زارۆيێن وان جهێن بێ به‌هر بووين ژ خواندنێ”.
ده‌رباره‌ى چاره‌نڤيسيێ وان قوتابخانێن ده‌رگه‌هێن وان هاتينه داخستن، پشتيوان سادق گۆت: “چارنڤيسێ ئه‌وان رێڤه‌به‌ريێن په‌روه‌رده‌يێن وان ده‌ڤه‌ران دێ بڕيارێ ل سه‌ر ده‌ن، ب گۆره‌ى ئه‌وان پێزانينێن گه‌هشتينه من، هه‌تا راده‌كێ باش ده‌رگه‌هێن قوتابخانان هاتينه ڤه‌كرن، به‌لێ ب گۆره‌ى هه‌موو پيڤه‌رێن جيهانى ده‌سپێكرنا قوتابخانێ پشتى بۆرينا دو هه‌يڤان ب ساناهى ناهێته قه‌ره‌بووكرن، ئانكو زيانه‌كا مه‌زن گه‌هشتيه وان قوتابخانان يێن بێ به‌هر بووين ژ خواندنێ”.
ده‌رباره‌ى ئايا خواندن ل هه‌رێما كوردستانێ ب گشتى دێ هێته راگرتن يان نه، وه‌زيرێ په‌روه‌ردێ گۆت: “70% ژ قوتابخانێن هه‌رێما كوردستانێ پرۆسا خواندنێ تێدا يا به‌رده‌وامه و هه‌ر قوتابخانه‌كا خواندن به‌رده‌وام بيت ناهێته راگرتن، به‌لێ ئه‌و قوتابخانێن ده‌رگه‌هێن وان د گرتى ئه‌و بابه‌ته‌كێ دى يه”.
