هه‌ولێر و به‌غدا بۆ پرسا نه‌فت و كاره‌بێ دێ كۆمیته‌كا هه‌ڤپشك پێك ئینن
ئه‌ڤرۆ نيوز:
د كۆمبوونا شاندێ به‌غدا ل گه‌ل جڤاتا وه‌زیرێن هه‌رێمێ دانوستاندن ل دۆر پێكئینانا كۆمیته‌كا هه‌ڤپشك هاته كرن ب مه‌ره‌ما به‌ر ب پێشبرن و چاوانیا رێكخستنا هه‌ماهه‌نگیا ناڤبه‌را به‌غدا و هه‌ولێرێ د بیاڤێ نه‌فت و كاره‌بێ دا.
ئه‌ڤرۆ نێچیرڤان بارزانى سه‌رۆك وه‌زیرێن هه‌رێما كوردستانێ پێشوازیا شانده‌كێ بلندێ حوكمه‌تا عیراقێ كر كو پێكهاتبوو ژ وه‌زیرێن، نه‌فتێ و كاره‌بێ و چاندنێ و په‌روه‌ردێ، د كۆمبوونێ دا هه‌ردو ئالیان به‌رهه‌ڤیا خوه بۆ ڤه‌كرنا به‌رپه‌ره‌كێ نوو و به‌رده‌وامیدان ب چاره‌كرنا كێشان ده‌ربرى.
هه‌ردو ئالیان هه‌روه‌سا به‌حسێ په‌یوه‌ندیێن هه‌رێم و به‌غدا بۆ قوناغا پشتى داعش كر ب تایبه‌ت ل وان ده‌ڤه‌رێن پێشتر ژ ئالیێ داعش ڤه هاتینه كۆنترۆلكرن و نوكه پێدڤى ب ئاڤه‌دانى و خزمه‌تكاریانه.
