هه‌ژماره‌كا زۆر یا پرتووكێن كوردی بۆ زمانێن بیانی دێ هێنه وه‌رگێڕان
هه‌ولێر، قائید میرۆ:
بریكارێ وه‌زاره‌تا ره‌وشنبیری و لاوان ل حوكمه‌تا هه‌رێما كوردستانێ ئاشكرا كر، پشتی فه‌رمانا مه‌سروور بارزانی بۆ وه‌رگێڕانا به‌رهه‌مێن ب زمانێ كوردی بۆ سه‌ر زمانێن جیهانی نێزیك چه‌ندین به‌رهه‌م دێ هێنه وه‌رگێڕان و پاره‌یه‌كێ زۆر ژی بۆ وه‌رگێڕانا به‌رهه‌مێن كوردی هاتیه مه‌زاختن.
دكتۆر سالار عوسمان، بریكارێ وه‌زاره‌تا ره‌وشنبیری و لاوان بۆ رۆژناما ئه‌ڤرۆ دیار كر، پشتی بڕیارا سه‌رۆكێ حوكمه‌تا هه‌رێما كوردستانێ بۆ وه‌رگێڕانا پرتووكێن ب زمانێ كوردی بۆ سه‌ر زمانێن جیهانی لیژنه‌یه‌كا تایبه‌تمه‌ند هاتیه پێكئینان و گۆت: “هه‌ژماره‌كا پرتووك و به‌رهه‌مێن كوردی بۆ زمانێن جیهانی هاتینه وه‌رگێڕان، به‌لێ بڕیاره پڕۆژه بهێته به‌رفره‌هكرن و ل نێزیك هه‌ژماره‌كا زۆر یا پرتووك و ڤه‌كۆلینێن كوردی بۆ زمانێن جیهانی دێ هێنه وه‌رگێڕان، چونكو به‌ری نوكه زێده‌تر پرتووك و ڤه‌كۆلین ژ زمانێن جیهانی بۆ زمانێ كوردی هاتینه وه‌رگێڕان و مخابن یێن كوردی زۆر كێم هاتینه وه‌رگێڕان”.
دكتۆر سالار عوسمان گۆتژی: “كه‌سێن بسپۆر و ئه‌كادیمی سه‌رپه‌رشتیا پڕۆژێ وه‌رگێڕانا به‌رهه‌مێن كوردی بۆ سه‌ر زمانێن بیانی دكه‌ن، ژ به‌ركو زێده‌تر ئه‌و به‌رهه‌م بۆ زمانێن بیانی دێ هێنه وه‌رگێڕان یێن ژ لایێ نه‌ته‌وه‌یی و زانستی و دیرۆكی و ئه‌ده‌بی ڤه مفا بۆ هه‌رێما كوردستانێ هه‌بیت، بڕیارا مه‌سرور بارزانی بۆ وه‌رگێڕانا به‌رهه‌مێن كورد د جهێ خوه دا بوویه و ئه‌زێ پشتڕاستم ئه‌و بڕیار دێ یا به‌رهه‌مدار بیت”.
