هه‌ڤركيا سەرەکی د ناڤبه‌را به‌غدا و هه‌رێمێ دا نە پەترۆلە
ئەڤرۆ نيوز:
شارەزایەکێ قانوونیێ عیراقی بۆ رۆژناما ئەڤرۆ ئاشکراکر کو ب زەحمەتە بەغدا و ھەرێم بگەھنە ڕێککەفتنەکێ ژبەر ھەبوونا گرفتێن مەزن د ناڤبەرا ھەردو لایەنان دا، خویاکر ژی ب چو شێوەکی ھەردو لایەن ناگەھنە چو ئەنجامان و حەیدەر عەبادی نەشێت ل دەرڤەی قانوونا بودحا 2016 ێ چو ڕێککەفتنەکێ ل گەل ھەرێما کوردستانێ بکەت، دیارکر ژی نوکە گەلەک یا ب زەحمەتە بەغدا و ھەرێم بزڤرن بۆ قوناغا بەری نوکە و ھەردو لایەن وەکو دو دەولەت ڕەفتارێ ل گەل ھەڤدو دکەن.
تارق حەرب شارەزایێ قانوونیێ عیراقی بۆ رۆژناما ئەڤرۆ گوت” ب دیتنا من چو ڕێککەفتن د ناڤبەرا حەیدەر عەبادی و شاندێ ھەرێما کوردستانێ دا ناھێنە کرن، ژ بەر کو ئەو کێشە و گرفتێن د ناڤبەرا ھەردو لایەنان دا ھەین، گەلەک د کوور و مەزنن.
ھەرێما کوردستانێ دەولەتەکا نە راگەھاندی یە
ل دۆر وێ چەندێ ئایا کێشا سەرەکی د ناڤبەرا ھەرێمێ و عیراقێ دا ل دۆر پرسا ھنارتنا پەترۆلێ یە ژلایێ ھەرێما کوردستانێ بێ لێزڤرین بۆ بەغدا، کو ھەکە ھنارتن ب ڕێیا بەغدا با دا بەھرا ھەرێمێ گەلەک کێمتر بیت ژ وێ چەندا ھەرێم ھناردە دکەت کو دا بەغدا 30% مەزاختیێن سیادی ڕاکەت، تارق حەرب گوت” نەخێر ناکۆکیێن ھەین نە گرێدای ڕێژەیا پەترۆلێ و ھنارتنا وێ ب ڕێیا بەغدا و کۆمپانیا (سۆمۆ) ی ڤەنە گرێدای داھاتێ فرۆتنا پەترۆلا ھەرێمێ یە ژی، بەلکو ناکۆکیا سەرەکی ئەوە کو ھەرێما کوردستانێ دخوازیت ژ عیراقێ جودابیت و ببیتە دەولەتا سەربخوە، د بەرامبەر دا حوکمەتا عیراقێ دخوازیت ھەرێما کوردستانێ د چارچۆڤێ عیراقێ دا بمینیت”.
ب دیتنا ڤی شارەزایێ قانوونیێ عیراقی کو دھێتە ھژمارتن ژ کەسایەتیێن نێزیک ژ نوری مالکی سەرۆک وەزیرێن بەرێ، ڕەفتارێن عیراقێ و ھەرێما کوردستانێ ل گەل ھەڤدو وەکو یێن دو دەولەتانە و زێدەتر بۆ ئەڤرۆ دبێژیت” بەلگە ل سەر ڤێ چەندێ ئەوە کو سەرەرای وێ ئێکێ کو مادا 78 ژ دستوورێ عیراقێ دبێژیت کو سەرۆکێ وەزیران بەرپرسە ژ دەولەتێ، بەلێ سەرۆک وەزیران حەیدەر عەبادی چو ئاخفتن و پێرابوون ل دۆر پرسا سەرۆکاتیا ھەرێما کوردستانێ نەبوون”.
گوت ژی” راستە عیراق و ھەرێم د راگەھاندنێ دا بەحس ناکەن، بەلێ ھەردو لایەن مامەلێ و ڕەفتارێ ل گەل ھەڤدو دکەن وەکو دو دەولەت، و نوکە چو تشتەک ھەرێما کوردستانێ ب بەغدا ڤە گرێنادەت ژبلی داھاتیێن دارایی د بودجێ دا،کو ئەوژی چو بۆ نینە”.
