هه‌ڤپه‌يمانيا فه‌تح به‌رسڤا كۆنگرێسێ ئه‌مريكا دده‌ت
ئه‌ڤرۆ نيوز، فاتما مزوورى:
ليستا فه‌تح كو ب ليستا ميليشياتێن شيعى دهێته نياسين به‌رسڤا كۆنگرێسێ ئه‌مريكا دا و راگه‌هاند كو ئه‌و هێزێن كرينه د ليستا تيرۆرێ دا، پشكه‌كا زيندى يا پرۆسا سياسى يا عيراقێ يه.
كۆنگرێسێ ئه‌مريكا هه‌ر ئێك ژ فه‌يله‌قا نوجه‌با و عه‌سائيب ئه‌هلۆلحه‌ت و حزبولا يا عيراقى يێن سه‌ر ب حه‌شدا شه‌عبى ڤه كرينه د ليستا تيرۆرێ دا و ڤێ چه‌ندێ ژى كارڤه‌ندانێن مه‌زن د ناڤا چه‌كدارێن شيعى دا دروست كريه.
هه‌ڤپه‌يمانيا فه‌تح يا كو هادى عامرى سه‌رۆكاتيا وێ دكه‌ت وه‌كو ره‌نگڤه‌دان ل سه‌ر ڤێ كريارا كۆنگرێسێ ئه‌مريكا راگه‌هاند كو ئه‌و هێز پشكه‌كا زيندى يا پرۆسا سياسى يا عيراقێ يه و دوژمنكارى ل هه‌مبه‌ر ڤێ چه‌ندێ چو مفايه‌ك نينه.
ئه‌حمه‌د ئه‌سه‌دى، په‌يڤدارێ ب ناڤێ هه‌ڤپه‌يمانيا فه‌تح د كۆنگره‌كێ رۆژنامه‌ڤانى دا ئاشكه‌را كر كو ئه‌وى پرۆژێ كۆنگرێسێ ئه‌مريكا شه‌رمزار دكه‌ن كو هێزێن جيهادى و سياسى و نشتيمانى يێن عيراقى خستينه د ناڤا ليستا تيرۆرێ دا، د ده‌مه‌كى دا كو وان شه‌رێ داعش كريه و وه‌لات ژ بزاڤێن تيرۆرستان پاراستينه.
