هه‌یڤانه گۆژمه‌كێ پاره‌ى ژ پشكه‌كا فه‌رمانبه‌ران دێ هێته برین
ئه‌ڤرۆ نیوز:
ژێده‌ره‌كى ژ وه‌زاره‌تا دارایى وئابوورى ل هه‌رێما كوردستانێ ئاشكراكر، ل گه‌ل به‌لاڤكرنا مووچێ هه‌یڤا 2 سالا 2019 وهه‌یڤێن د دووڤدا دێ قستێن سولفێن هه‌ڤژینیێ وخانوبه‌ران ژ فه‌رمانبه‌ران هێنه وه‌رگرتن.
وى ژێده‌رى رۆهنكر ژى كو دلیستا مووچێ هه‌یڤا كانوونا دویێ 2019 چو گۆژمه‌كێ پاره‌ى وه‌كو قه‌رێ سولفه‌یا هه‌ڤژینیێ وخانوبه‌ران ژ فه‌رمانبه‌ران ناهێته وه‌رگرتن، به‌لێ د گه‌ل لیستا هه‌یڤا شوباتا 2019 ویێن د دووڤدا گۆژمێ قستێن سولفه‌یا هه‌ڤژینیێ وخانوبه‌ران ژ فه‌رمانبه‌ران ومامۆستایان وهه‌موو مووچه‌خۆران دێ هێته برین ورێنمایێن نوو ژى ل دۆر وێ چه‌ندێ دێ هێنه ده‌ركرن.
ژێده‌رێ وه‌زاره‌تا دارایى زێده‌تر بۆ باسنیوز گۆت” لدووڤ رێنمایێن وه‌زاره‌تا دارایى، ئه‌و فه‌رمانبه‌رێن سولفه‌یا هه‌ڤژینیێ وه‌رگرتى، ل گه‌ل لیستا مووچێ هه‌یڤا 2 وهه‌ڤیا 8 گۆژمێ 180 هزار دینار ژ مووچێن وان هێنه برین كو بۆ ساله‌كێ دبیته گۆژمێ 360 هزار دیناران، به‌لێ ئه‌وێن سولفه‌یا خانوبه‌ران وه‌رگرتى، هه‌موو هه‌یڤان گۆژمه‌كێ پاره‌ى ژ مووچێن وان دێ هێته برین.
پێشتر ژ ئه‌گه‌رێ بجهئینانا سیسته‌مێ پاشكه‌فتا مووچه‌ى، دانا قستێن سولفه‌یێن هه‌ڤژینیێ وخانوبه‌ران ژ مووچه‌خۆران هاتبوو راگرتن، به‌لێ پشتى هه‌لوه‌شاندنا سیسته‌مێ پاشكه‌فتا مووچه‌ى، بریار هاتیه دان ل گه‌ل لیستا مووچێ هه‌یڤانه گۆژمه‌كێ پاره‌ى ژ قستێ وان سولفه‌یان بهێته برین.
