هونهرمهندهكێ كورد ل هۆلەندا پشكداری د كۆنسێرتهكا کەلتۆری دا كر
زنار تۆڤی:
كاروان حهمید حهلاق، هونهرمهندێ كورد، ب دو سترانان پشكداری د كۆنسێرتهكا کەلتۆری بۆ نهتهوێن جیهانی دا كر، ل باژێرێ ههرمل ل وهلاتێ هۆلهندا هاتبوو گێران.
كاروان حهمید حهلاقی دیار كر: ئهز گهلهك یێ خۆشحالم كو من پشكداری د وێ كۆنسێرتا کەلتۆری ل وهلاتێ هۆلهندا كری، د وێ فیستیڤالێ دا نهتهوه و کەلتۆرێن جودا و ئاههنگێن ههمهرهنگ و جودا یێن کەلتۆری هاتنه گێران، ههروهسا د وێ كۆنسێرتێدا ب دو سترانان من پشكداری تێدا كر و ب رێیا دهنگ و موزیكا كوردی، ئهز شیام پشكهك ژ کەلتۆر و ناسناما كوردان بگههینمه ئامادهبوویان و ئێك ژ وان سترانێن من گۆتی، سترانا هونهرمهندێ وهغهركری و نهمر شهمال سائیبی بوو، بۆ من پێشكێشكرنا بهرههمێ وی هونهرمهندی ب تنێ گۆتنا سترانێ نهبوو، بهلكو رێزگرتنه ل بهرههمێ هونهری یێ هونهرمهندێن كورد كو بهرههمێن وان پشكهكن ژ دیرۆكا مۆزیكا كوردی.
ناڤهاتی گۆت ژی: سترانا دووێ یا هونهرمهندێ وهغهركری مامۆستا عوسمان عهلی بوو، ئهو سترانه من ل گهل ئۆركێسترا ئارت موزیك گۆت و نێزیكی 10 موزیكژهنێن ناڤدار یێن هۆلهندی و جیهانی د پێشكێشكرنا وی بهرههمیدا پشكدار بوون، ههروهسا بۆ من گهلهك یا گرنگ بوو، كو ئهز سترانێن كوردی ل گهل ئۆركێسترایێن نێڤدەولەتی پێشكێش بكهم، چونكی ئهڤه دهرفهتهكه بۆ هندێ مۆزیکا كوردی ل گهل مۆزیک و کەلتۆرێن دیتر یێن جیهانی تێكهل ببیت و كهسێن ئامادهبوویی ب رهنگهكێ جودا هونهر و كولتوورێ كوردی بنیاسن، دیسا من ستران ب جلكێن كوردی گۆتن و ئهڤه كارهكێ گرنگه لدهف من، چونكی ب ڤێ چهندێ ئهم دشێین پتر خزمهتا هونهر و سترانا كوردی بكهین و خهلك ژی دێ كولتوورێ مه پتر نیاسن و ب رهنگهكی، كو پتر سهرنجا خهلكێ بیانی بۆ كولتوورێ مه دهێته راكێشان.
كاروانی گۆت ژی: پشكداریا من د ڤێ كۆنسێرتێ دا بۆ من ب تنێ پشكداریهكا هونهری نهبوو، بهلكو ههستهكێ شانازیێ بوو كو بشێم ب دهنگێ سترانێ و موزیكێ جلكێن كوردی، پشكهك ژ ناسنامه و كولتوورێ خۆ یێ كوردی ل پێش چاڤێن خهلكێ جیهانێ پێشكێش بكهم، ههروهسا ب باوهریا من هونهر ئێكه ژ باشترین زمانان بۆ نێزیككرنا مرۆڤان، سترانێن مه ژی پێدڤی ب زمانهكێ ههڤپشك نینه بۆ هندێ كاریگهریا خۆ ههبیت، مۆزیك دشێت، ههكه مرۆڤ ژ چ نهتهوه و كولتوورهكێ بن، نێزیكی ئێك بكهت.
ههروهسا ئاشكهرا كر ژی: ههموو دهمان د چالاكیێن هونهری دا ل دهرڤهیی وهلاتی، ب ستران و موزیك و جلكێن كوردی، ئهز دهنگ و كولتوورێ كوردان د گههینمه خهلكێ بیانی و دهرفهتهكێ دروست دكهم بۆ هندێ پتر كولتوورێ كوردان بهێته نیاسین.
هورنهمهندێ كورد، كاروان حهمید حهلاق، خهلكێ كهركووكێ یه و ئهڤ چهندین ساله ل وهلاتێ هۆلهندا دژیت.
