هژمارا تيرۆرستێن داعشێ ل سه‌ر سنورێ عيراقێ وسووريێ دهێته ئاشكراكرن
ئه‌ڤرۆنيوز:
شاره‌زايه‌كێ بوارێ كاروبارێن گرۆپێن توندره‌و دا هژمارا چه‌كدارێن تيرۆرستێن داعشێ دناڤ ئاخا سووريێ دا ل سه‌ر سنورێ عيراقێ ئاشكرا دكه‌ت پشتى كونترۆلكرنا وان چه‌كداران بۆ ده‌ڤه‌رێن هێزێن سووريا ديموكراتى خوه ژێ ڤه‌كێشاى.
هيشام ئه‌لهاشمى، شاره‌زايه‌كێ بوارێ كاروبارێن گرۆپێن توندره‌و بۆ مالپه‌رێ (روسيا اليوم) يێ روسى گۆت” نێزيكى سێ هزار چه‌كدارێن داعشێ يێن ل ده‌ڤه‌را (جيب الهجين) يا سوورى كو يا هه‌ڤسنوره ل گه‌ل عيراقێ ل پارێزگه‌ها ئه‌نبار”.
دياركر ” 800 ژ وان سێ هزار چه‌كدارێن تيرۆرستێن داعشێ، وه‌لاتيێن عيراقى نه ويێن دى ژى ژ ره‌گه‌زنامێن عه‌ره‌بى وبيانى يێن جۆرا وجۆرن”.
ئاشكراكر ژى” ئه‌و چه‌كدارێن داعشێ ل هيڤيا ده‌ليڤه‌كێ نه كو بهێن دناڤ ئاخا عيراقێ دا”.
گۆت ژى”هه‌بوونا چه‌كدارێن داعشێ ل نێزيك سنوري عيراقێ مه‌ترسيه‌كا مه‌زنه ل سه‌ر عيراقێ وسه‌قاى وتوزبارينێ ب ده‌ليڤه دبينن بۆ هێرشكرنێ ل سه‌ر هێزێن عيراقى، له‌وما پێدڤيه هێزا فرۆكه‌ڤانيا له‌شكرێ عيراقێ وهه‌ڤپه‌يمانيا نێڤده‌وله‌تى لڤينێن فرۆكێن خوه ل هنداڤى وان ده‌ڤه‌ران زێده‌تر بكه‌ن”.
وه‌زاره‌تا به‌رگريا عيراقى ژى ئه‌ڤرۆ دوشه‌مبى 29/10/2018 به‌لاڤكر كو چه‌كدارێن داعشێ بزاڤا هاتنا دناڤ ئاخا عيراقێ دكه‌ن ژ سووريێ،
وه‌زاره‌تا ناڤبرى دياركر ژى كو پشتى داعشێ دو باژێرك ل رۆژهه‌لاتا پارێزگه‌ها دێرلزۆر كونترۆلكرين ب شێوه‌كێ به‌ربه‌لاڤ ل سه‌ر سنورێ سووريێ هاتينه به‌لاڤكرن.