هژمارا گەشتیارێن هەرێمێ دێ گەهیتە حەفت ملیۆن گەشتیاران
ئەڤرۆ نیوز ، تۆڤی:
هەرێما كوردستانێ ل بەره چار ماستەر پلانێن گەشتیاری بێخیتە د وارێ بجهئینانێ دا، پەیڤدارێ دەستەیا گشتی یا گەشتوگوزارا هەرێمێ ژی دبێژیت: هەتا سالا 2025 د ئێک سال دا دێ هژمارا گەشتیاران ل کوردستانێ گەهینینە حەفت ملیۆن گەشتیاران.
نادر رۆستی پەیڤدارێ دەستەیا گشتی یا گەشتوگوزارێ ل هەرێما کوردستانێ بۆ ئەڤرۆ نیوز دیارکریه: بۆ پێشخستنا كەرتێ گەشتیاری ل کوردستانێ مە پلانەکا ستراتیژی هەیە و هەتا سالا 2025 رێژا هاتنا گەشتیاران دێ بۆ حەفت ملیۆن گەشتیاران بلند بیت، ئەڤ چەندە دێ داهاتەکێ باش بۆ هەرێما کوردستانێ پەیدا کەت.
ناڤهاتی زێدەتر گۆتیە: ب هاتنا وان گەشتیاران دێ داهاتێ گەشتیاری بۆ بازارێن کوردستانێ نێزیكی دو ملیار دۆلاران زێدە بیت، ئەڤە ژی دێ ب رێیا 10 تەوەرێن جۆدا بیت، دناڤا پلانا ستراتیجی یا دەستەیا گشتی یا گەشتوگۆزارێ ل هەرێما کوردستانێ، ب تایبەتی تەوەرێن کارگێری و قانوون و رێنمایی و هاریکاریکرنا کەرتێ تایبەت، گرنگیدان ب جهێن دیتر یێن گەشتیاری و تەوەرێ بازارکرنێ و تەوەرێ پاراستنا ژینگەها کوردستانێ و چەندین تەوەرێن دیتر، دیسا هژمارەکا رێڤەبەران کاری ل سەر ڤان تەوەران دکەن ژ پێخەمەت بگەهینە وان ئارمانجێن ستراتیجی، هەروەسا دیزاین بۆ پتری 67 پرۆژێن گەشتیاری ل هەرێمێ هاتینە دانان.
نادر رۆستی ئەو ژی گۆت: مە وەک دەستەیا گشتی یا گەشتیاری ل کوردستانێ چار ماستەر پلانێن ستراتیژی هەنە کو پرۆژێن گەشتیاری نە و هەموو د ئاستێ جیهانی دانە، ئەو ژی ماستەر پلانێن (سەر بەنداڤا دۆكان، چیایێ سەفین، بەنداڤا دهۆكێ و چیایێ زاوا)، کو پێدڤیە حوکمەت پشتەڤانیێ لێ بکەت هەتاکو دهێنە جێبەجێ کرن، ب ڤێ چەندێ ژی کوردستان دێ گەهیتە ئاستێ وەلاتێن جیهانی د كەرتێ گەشتیاری دا.
ناڤهاتی دیارکر ژی: ستراتیجیەتا مە ئەوە کو پێش هەموو هەلکەفت و جەژنان ئەم ئامادەكاریێن پێدڤی دكەین، بۆ هندێ کو زۆرترین گەشتیار بهێنە هەرێما کوردستانێ داکو داهاتێ گەشتیاری زێدەتر بیت و مە سەرکەفتن دڤێ پلانێ دا ئینایە، هەروەسا مە وەكو دەستەیا گەشتوگوزارێ هەماهەنگیەکا باش ل گەل كۆمپانیان هەیە بۆ ئینانا گروپێن گەشتیاری یێن بیانی بۆ کوردستانێ و هەروەسا 670 جهێن گەشتیاری ل کوردستانێ هاتینە جی پی پێس کرن و ژ نوکە وێڤە خەلک دێ ب ساناهی ب وان جهان کەڤن و ئەو جهە هەموو دێ بنە جهێن گەشتیاری ل کوردستانێ.
نادر رۆستی دبێژیت ژی: نەمانا داعشێ وەکریه کو هاتنا گەشتیاران بۆ هەرێمێ ب پاس و ترۆمبێلێن تایبەت د زێدەبوونێ دایە و ئەڤەژی خالەکا گەلەکا ئەرێنی یە، دیسا جێگیربوونا دۆخێ ئەمنی و ئەو پلانا گەشتیاری یا مە دانای وەکریە کو گەلەک جارا ئۆتێل و جهێ ڤەحەوهانێ ب دەست گەشتیاران نەکەڤیت، لەوما دۆخێ گەشتیاری ل کوردستانێ وەكو پێش شەرێ داعشێ لێهاتیە، ئەڤ سالە گەلەک گرۆپێن گەشتیاری هاتینە کوردستانێ.
