هژماره‌كا لايه‌نێن سیاسی بزاڤا هه‌لوه‌شاندنا حوكمه‌تا عيراقى يا نوو دكه‌ن
ئه‌ڤرۆنيوز:
ژێده‌ره‌كێ ئاگه‌هدار ل به‌غدا ئه‌ڤرۆ چارشه‌مبى 31/10/2018 راگه‌هاند كو بزاڤه‌كا هه‌ى بۆ تانه‌لێدان ل كۆمبوونا بۆرى يا په‌رله‌مانێ عيراقێ كو تێدا باوه‌رى ب حوكمه‌تا عادل عه‌بدولمه‌هدى هاتيه دان.
هژماره‌كا لايه‌نێن سياسى بۆ هه‌لوه‌شاندنا حوكمه‌تا نه تمام يا عادل عه‌بدولمه‌هدى رێيا تانه‌لێدان ل وێ كۆمبوونا په‌رله‌مانێ عيراقێ گرتيه به‌ر كو تێدا په‌رله‌مانى باوه‌رى ب به‌رنامێ حوكمه‌تێ وسه‌رۆك وه‌زيران و14 وه‌زيران داى.
ل دووڤ ده‌زگه‌هێن راگه‌هاندنێ يێن عيراقى، هێجه‌تا وان لايه‌نێن سياسى ئه‌وه كو دوێ كۆمبوونێ دا چه‌ندين قانوون هاتنه پێشيلكرن وئه‌و كۆمبوون ب كۆمبوونه‌كا قانوونى ناهێته هژمارتن.
هه‌روه‌سا ئاماژه ب وێ چه‌ندێ دهێته كرن كو چه‌ند وه‌زيرێن كابينا عه‌بدولمه‌هدى ده‌نگێ كێمتر ژ 50 په‌رله‌مانتاران بده‌ستڤه‌ئينايه وژلايێ ده‌سته‌يا سه‌رۆكاتيا په‌رله‌مانى ب باوه‌رپێكرى هاتينه هژمارتن، ئه‌ڤه ژى ژئه‌نجامێ وان فشارێن سياسى يه كو ل سه‌ر سه‌رۆكاتيا په‌رله‌مانى هاتينه كرن.
ل دووڤ هنده‌ك شرۆڤه‌كاران نوكه هزرا وێ چه‌ندێ يا هه‌ى كو ل دادگه‌ها فيدارلى سكالا بهێته تۆماركرن وگومان ل وێ كۆمبوونا په‌رله‌مانى بهێته كرن وب نه‌قانوونى بهێته هژمارتن.