هۆشداری و سزا بۆ یانەیێن زاخۆ و ئاكرێ هاتنە دەركرن
قەیس وەیس:
د كۆموبونا خوە یا ڤێ حەفتیێ دا فیدراسیۆنا تەپا پێی یا كوردستانێ چەند بڕیار و راسپاردەیێن نوو دەركرن، ژ وانا ل دووڤ راپۆرتێن سەرپەرشتییار و دادڤانێن چەند یاریێن گەڕا چارێ بۆ یانەیێن پلا نایاب تێدا هوشداری و سزا بۆ یانەیێن زاخۆ و ئاكرێ هاتینە دەركرن.
ل سەر راپۆرتا سەرپەرشت و دادڤانێ یارییا ئاكرێ و هەولێرێ فیدراسیۆنا تەپا پێی یا كوردستانێ ئەڤ بڕیارە دەركرن، سزادانا یانەیا ئاكرێ ب كۆژمەیێ 250 هزار دیناران ژبەر رەفتارێن هندەك ژ جەماوەرێ وەرزشی یێ یانەیا ئاكرێ، ئاگەهدارییا دووماهیێ بۆ یانەیا ئاكرێ هەكە دووبارە بیت دێ یاریێن وێ ژ دەرڤەیی یاریگەها وێ هێنە كرن، هەروەسان یاریزانێ وان سەلاح حەسەن بۆس ێ یارییان هاتە دوورئێخستن ژبەر رەفتارا نە وەرزشی د ناڤ یاریگەهێ دا، ژلایەكێ دووڤە سەرپەرشتێ تیما یانەیا هەولێرێ دیدار حامد بۆ دو یارییان هاتە دووركرن پشتی دەرچوون ژ گیانێ وەرزشی كری.
ژلایەكێ دووڤە فیدراسیۆنا تەپا پێی یا كوردستانێ هوشدارییا دووماهیێ دا یانەیا زاخۆ ژبۆ دابینكرنا جهەكێ تایبەت بۆ راگەهاندكار و كامیرەمانێن دەزگەهێن راگەهاندنێ كود ووربن ژ جهێن جەماوەرێ یانەیێ و هەكە بۆ یارییا بهێت نە هێتە دابینكرن دێ بڕیارا سزایی هێتە دەركرن.
