ساخلەمییا دەروونی
خانم حسێن
ئەڤرۆ ل جیهانەكێ كو بلەز یا تەكنۆلۆژیایێ و كاودانێن ژیانێ ب بەردەوامی فشارێ ل سەر مەژیێ مرۆڤی دروست دكەن، گەلەك جاران ئەم گرنگیەكا مەزن ددەینە ساخلەمیا جەستە یی نە دەروونی، هەكە تشتەك ل گەل مە پەیدا دبیت، ئێكسەر سەرەدانا نوژداری دكەین، لێ مخابن دەمێ كو ئێش ئێشا دەروونی بیت، یان ستریس و بێهێزی ل سەر مە بگریت زۆر جاران خۆ بیدەنگ دكەین و ب چڤە نا وەرگرین ژیانا خۆ دەرباز دكەین و پشت بەستنێ ل سەر خۆراگرییا بێ دووماهی دكەین، ئەڤەژی شاشیەكا مەزنە.
مخابن هێشتا جڤاكا مە هزر دكەت كو نەخۆشیێن دەروونی شەرمە یان كێماسییەكە ل دەڤ مرۆڤی، ژبەر هندێ گەلەك جاران دەروونێ كەسی گەلەك تێك دچیت و ژ ئێشانان دكەلیت، لێ ژ ترسێ نەشیت ب ئاشكرا بەحس بكەت، دا خەلك چ ناڤێ دیناتییێ» پیڤە نەكەت و نەبیژنێ.
ساخلەمیا دەروونی نە بتنێ نەبوونا نەخۆشییێن دەروونی یە، بەلكو پێكهاتەیەكە ژ شیانێن مە بۆ ئارامبوونێ، مامەلەكرن ل گەل فشارێن ژیانێ، و دروستكرنا پەیوەندییێن پۆزەتیڤ ل گەل دەوروبەران هەستكرن ب خەمۆكیێ، بێهێزی یان ترسێ، تشتەكێ ئاسایی یە و پشكەكە ژ سرۆشتێ مرۆڤی، لێ یا گرنگ ئەوە ئەم نە هێلین ئەڤ هەستە ببنە زیندانەك بۆ دەروونێ مە و ژ بۆ پاراستنا ساخلەمیا دەروونی ئەم پێدڤی ب هندەك ڕێبازێن هشیاریێ هەنە،
باوەریبوون ب هەستان، دانپێدان ب لاوازییا خۆ ئێكەم پێنگاڤە بەرەف چارەسەریێ و بهێزكرنا ناخی، سنوورداركرنا فشاران دەمەكێ تایبەت بۆ خۆ و بۆ بێهنڤەدانێ دابینكرن، دوور ژ ژینگەیێن پڕی مژار و بارگرانی.
ئاخفتن و پشكداریكرن پارڤەكرنا خەم و ئێشانان ل گەل كەسەكێ نیزیك یان خودان شیان، چونكی گۆتن پشكەكا مەزن ژ باری كێم دكەت، باوەر بكە، مەژیێ مرۆڤی ژی وەكی هەر ئەندامەكێ جەستەی پێدڤی ب ئارامبوون و ڤەخۆاندنێ هەیە، باوەریا خۆ نوو بكە، دەروونێ تە مافێ خۆ یێ ئارامیێ هەیە و نەترسە ژ خواستنا هەوارێ دەربڕینە ژ هێزا تە، نە ژ لاوازییا تە.