هیومان رایتس ووچ: هەتا نوكە ئاوارەیێن شنگالێ نەهاتینە قەرەبووكرن
رێكخراوا هیومان رایتس ووچ، ل دۆر قەرەبووكرنا ئاوارەیێن شنگالێ راگەهاند: رێز ل ئەوان سۆزا نەهاتە گرتن كو بۆ قەرەبووكرنا خەلكێ شنگالێ هاتبوونە دان. ئاماژە ب ئەوێ چەندێ ژی كر، تنێ ل سالا بۆری نێزیكی سێ هزار و 500 خێزانان داخوازا قەرەبووكرنێ پێشكێشی فەرمانگەها دارایی ل پارێزگەها نەینەوا كربوو، ئەڤ هەژمارە نوكە بۆ 10 هزار خێزانان بلند بوویە، بەلێ هەتا نوكە نەهاتینە قەرەبووكرن.
رێكخراوا هیومان رایتس ووچ، د نووترین راپۆرتدا ل دۆر پرسا دائێخستنا كەمپێن ئاوارەیان ل ئیراقێ و چاوانییا قەرەبووكرنا ئاوارەیان و زڤرینا وان بۆ دەڤەرێن خوە، ئاماژە ب ئەوێ چەندێ كریە كو پشتی سالەكێ ژ بڕیارا قەرەبووكرنا ئاوارەیێن شنگالێ، هەتا نوكە وەكو پێدڤی هاریكارییا وان نەهاتییە كرن و هەتا نومە ژی نێزیكی 10 هزار خێزانان فۆرما داخوازییا قەرەبووكرنێ پێشكێشكریە، بەلێ نەهاتینە قەرەبووكرن.
رێكخراوا ناڤبری د راپۆرتەكا خوە دا ل دۆر رەوشا ئاوارەیێن شنگالێ و چاوانییا قەرەبووكرنا وان ئاماژە ب ئەوێ چەندێ كر» بەری 10 سالان شنگال مەیدانا تاوانێن شەڕی یێن گران و ئاوارەبوونا ب كۆم بوو و هەتا ئەڤرۆ ژی نێزیكی 183 هزار شنگالی د ئاوارەییدا دژین، بەلێ سەرەرای چەندین سالێن چاڤەڕێبوونێ، هیچ كەسەكی ل شنگالێ ئەو پارە و قەرەبوویە وەرنەگرتییە كو ب گۆڕەی قانوونا ئیراقی مافێ وانە بەرامبەر وێرانكرن و زیانگەهاندنێ ب ملك و مالێن وان، بهێنە قەرەبووكرن».
ب گۆڕەی راپۆرتا رێكخراوا هیومان رایتس ووچ» 80% ژێرخان و 70% خانیێن باژێرێ شنگالێ ژ ئەگەرێ شەڕێ داعشێ یێن وێران بووین و نەهاتینە قەرەبووكرن، ب جۆرەكی پشكەكا مەزن ژ ئاوارەیێن شنگالێ، پێدڤی ب هاریكارییا دارایی یا هەی بۆ ئەوێ چەندێ دەڤەرێن خوە ئاڤەدان بكەن. پشتی حەفت سالان ژ نەمانا داعشێ، نوكە ژی ب هزاران خێزانێن شنگالێ ل كەمپێن هەرێما كوردستانێ دژین و پێدڤی ب هاریكارییا رۆژانە یا هەی».
هیومان رایتس ووچ ئاماژە كر» ل سالا بۆری نێزیكی سێ هزار و 500 خێزانان داخوازا قەرەبووكرنێ پێشكێشی فەرمانگەها داراییا پارێزگەها نەینەوا كربوو، ئەڤ هەژمارە نوكە بۆ 10 هزار خێزانان یا بلند بووی، بەلێ هەتا نوكە نەهاتینە قەرەبووكرن. ب جۆرەكێ پشكەك ژ ئەوان شنگالیێن زڤرینە جهێن خوە، پشتی نووژەنكرنا خانیێن خوە، هێشتا حوكمەتا ئیراقێ قەرەبوو نەكرینە. ژ گرفتێن دی ئەوێن روو ب روویی ئەوان دبن، نەبوونا خزمەتگوزارییان و ژێرخان و نەسەقامگیرییا ئەمنییە، ب جۆرەكی پترییا وان د ئەوێ باوەریێ دانە ژیان ل شنگالێ گەلەك ژ ناڤ كەمپان خوەشتر نینە».
ل دووماهییا راپۆرتێ ئەوێ رێكخراوی هاتییە» پێدڤییە حوكمەتا ئیراقێ پێنگاڤێن رژد بۆ ئاڤەدانكرنێ و نووژەنكرنێ و قەرەبووكرنێ، ئالیێ كارگێری و ئاسایشا باژێرێ بگریتە بەر».
