هیڤیدارین دادگەها فیدرال د بەرسڤا نامەیا مە دا بڕیارەكا ئەرێنی و د بەرژەوەندییا خەلكێ كوردستانێ دا دەربكەت
سەرۆكێ حوكمەتا هەرێما كوردستانێ ل كۆمبوونا جڤاتا وەزیرێن هەرێمێ ل دۆر مووچەیان راگەهاند: ئەڤ بابەتە گرنگترین بابەتە ل دەف مە، هەروەسا ئاماژەكر: ل ڤان رۆژان من نامەیەك بۆ دادگەها بلند یا فیدرالی هنارتییە و چاڤەڕێنە و هیڤیدارین دادگەه د مفایێ خەلكێ كوردستانێ و مووچەخۆرێن هەرێما كوردستانێ بڕیارێ بدەت
دوهی چارشەمبی 18/6/2025، ب سەرپەرشتییا مەسرور بارزانی، سەرۆكێ حوكمەتا هەرێما كوردستانێ و ب بەرهەڤبوونا قوباد تالەبانی، جێگرێ سەرۆكێ حوكمەتا هەرێمێ، جڤاتا وەزیرێن هەرێما كوردستانێ كۆمبوو.
ل دەستپێكا كۆمبوونێدا، سەرۆكێ حوكمەتا هەرێما كوردستانێ ئاماژە ب بابەتێ بڕینا مووچە و شایستەیێن دارایی یێن هەرێما كوردستانێ ژ ئالیێ بەغدایێ ڤە كر و گوت» ب هەموو شێوەیەكی، د بزاڤ و كاركرنا خوە دا د بەردەوامین بۆ چارەسەركرنا ڤێ كێشەیێ و بۆ ڤێ مەبەستێ ژی ل رۆژێن بۆری، مە نامەیەك بۆ دادگەها فیدرالی هنارتییە سەبارەت ب نەقانوونی و نە دستووریبوونا بڕیارا بڕینا مووچە و شایستەیێن دارایی یێن هەرێما كوردستانێ ژ ئالیێ وەزارەتا داراییا فیدرالی ڤە».
سەرۆكێ حوكمەتا هەرێما كوردستانێ گوت ژی» هیڤیدارین دادگەها فیدرالی د بەرسڤا نامەیێدا بڕیارەكا ئەرێنی و د مفایێ خەلكێ كوردستانێدا دەربكەت، ب تایبەتی ژی كو حوكمەتا هەرێما كوردستانێ هەموو پێگیریێن خوە یێن دستووری بجهئیناینە و د خوازیت د بەرامبەر ژی دا، رێز ل مافێن وێ یێن دستووری بهێتە گرتن و شایستەیێن دارایی بهێنە هنارتن».
پاشی جڤاتا وەزیرێن هەرێما كوردستانێ ل دۆر دووماهی پێشهاتێن شەڕ و ئالۆزیێن دەڤەرێ و كاریگەریێن وان ل سەر هەرێما كوردستانێ كر.
سەبارەت ڤێ چەندێ جڤاتا وەزیرێن هەرێما كوردستانێ، دوپاتیێ ل هەلوەستێ نەگهۆر یێ هەرێما كوردستانێ كر، كو هەردەم دژی شەڕ و گرژیێ و وێرانكاریێ بوویە و وەك هەردەم ژی دێ فاكتەرەكێ گرنگ یێ ئاشتیێ و ئارامیێ بیت و نابیتە جهێ گەفێ ل سەر هیچ وەلاتەكێ جیران و هیچ ئالییەكی.
جڤاتا وەزیرێن هەرێما كوردستانێ دوپاتكر ژی كو هەرێما كوردستانێ، پشتەڤانیێ ل هەموو بزاڤان دكەت بۆ چارەسەركرنا كێشە و گرفتان ب رێكا دانوستاندنێ و پاراستنا ئاشتیێ و تەناهیێ ئیراقێ و هەرێما كوردستانێ ودەڤەرێ.
