هێرشا ئورۆپا بۆ سه‌ر چينێ ده‌ستپێكر
رێکخراوا هەلسەنگاندنا سەلامەتییا ترۆمبێلان ل ئوروپا (Euro NCAP) پرۆتۆکۆل و پێڤەرێن نوو یێن سەلامەتییێ بۆ سالا ٢٠٢٦ێ ب فەرمی کارا کرن. د ڤان پێڤەرێن نوو دا بڕیارەکا سەرسۆڕهێنەر هاتە دان: ئێدی رێ ناهێتە دان فەرمانێن سەرەکی و گرنگ یێن شۆفێریێ ببنە د ناڤ شاشا دەستلێدانێ (لەمس) یان دوگمەیێن تەخت یێن بێ کلیل دا!
ژ بۆ هندێ هەر ترۆمبێلەک نمرەیا بلندا ب ساناهیکرن و سەلامەتییێ ب دەست ڤە بینیت، دڤێت ئەڤ چار فەرمانێن سەرەکی ب تنێ ب رێيا دوگمەیێن راستى یێن میکانیکی یان دەسکان بهێنە کۆنترۆلکرن:
١. دەسکێ فلێشەر و ئیشارەتان.
٢. کۆنترۆلا دەسکێ رووبه‌رێن جامان.
٣. دوگمەیا چوار فلێشەر / هەوارهاتنێ (هاوارچوونێ).
٤. هۆڕنا سوکانی.
ئەنجامێن سەرسۆڕهێنەر یێن ترۆمبێلێن چینی د ڤێ تاقیکرنێ دا:
– کۆمپانییا لیپ مۆتۆر (Leapmotor B05): نمرەیا کارەساتبار یا 0% (سفر ژ سەدێ) د پشکا ب ساناهیکرن و سەلامەتییا دوگمەیان دا وەرگرت! چونکی نێزیکی هەمی تشت ئێخستینە د ناڤ شاشە و لەمسا سەر سوکانی دا.
– مینیڤانا لوکس یا Xpeng X9: سەرەرای شاهانەییا وێ یا زۆر، ب تنێ 20% ژ نمرەیێ ئینا.
– براندێن Zeekr 7GT و GAC Aion UT: هەردو تووشی هەمان شکەستن بوون و نمرەیا لاواز یا 20% ب دەست ڤە ئینا.
– سەرکەفتنا Geely E2: کۆمپانییا جیلی ژ بەر کو د مۆدێلا E2 دا دوگمەیێن حەقیقی پاراستینە، نمرەیا بلندا 80% مسۆگەر کر.
– بلنداهییا ئەندازیارییا ئەلمانیا: ترۆمبێلا کارەبایی BMW iX3 نمرەیا تەمام و بێ کێماسی یا 100% ژ بۆ جهێ دروست یێ دوگمە و دەسکێن میکانیکی ب دەست ڤە ئینا.
سەرەرای لاوازیێ د پشکا دوگمەیان دا، ترۆمبێلا Xpeng X9 ژ لایێ بهێزییا لەشی، ئێرباگ و تاقیکرنا لێککەفتنا دژوار دا شیا پێنج ستێرکێن تەمام یێن سەلامەتییا گشتی ب دەست ڤە بینیت.
