هێزه‌كا زۆر به‌ر ب سنورێن تله‌عفه‌ر ڤه چوو
ئه‌ڤرۆ نيوز:
ل گه‌ل ده‌سپێكرنا بۆردۆمانا ئه‌سمانى بۆ سه‌ر باژێرێ تله‌عفه‌ر، له‌شكرێ عيراقي هێزه‌كا زۆر يا له‌شكرى ل سنورێ باژێركێ تله‌عفه‌ر كۆمكر.
ئه‌ڤرۆ رۆژا سێشه‌مبى رائيد شاكر جه‌وده‌ت، فه‌رماندێ پۆليسێن فيدرالێن عيراقێ د به‌ياننامه‌كێ دا كو وێنه‌ك ب ده‌ست ئه‌ڤرۆ نيوز كه‌فتيه، راگه‌هانديه كو هێزه‌كا پۆليسێن فيدرال ژ فرقا پێنج و سێ و فه‌وجێن قه‌ناس و فرۆكه و ب ده‌هان ترۆمبێلێن زريپۆش گه‌هشتنه ده‌وروبه‌رێن تله‌عفه‌ر و هه‌موو ئاماده‌كاريێن لوجستيكى ب دووماهى هاتينه بۆ شه‌رێ ئازادكرنا تله‌عفه‌ر.
رائيد شاكر ئاماژه ب وێ چه‌ندێ ژى كر كو هێزێن وان د به‌رده‌وامن ل سه‌ر پاقژكرنا ده‌ڤه‌رێن ئازادكرى يێن پشكا راستێ يا مووسل ژ پاشمايێن داعش.
